Arystanbek Muhamedıuly: Dımashtyń Nıý-Iorktegi kontserti úshin 15 myń oryndyq zal aldyq

NUR-SULTAN. QazAqparat - Mádenıet jáne sport mınıstri Arystanbek Muhamedıuly QazAqparat tilshisine ánshi Dımash Qudaıbergenniń Nıý-Iorkte ótetin shoý-kontsertine qatysty málimetterimen bólisti.

«Nıý-Iork qalasyndaǵy tanymal «Madison Square Garden» sport kesheninde eki zal bar. Onyń biri 5,5 myń oryndyq bolsa, ekinshisi 15 myń oryndyq. Biz 23 qazanǵa 5,5 myń oryndyq zalyn alyp qoıǵan edik. Biraq, qazir jan-jaqty taldaı otyryp, 15 myń oryndyq alyp, ne bolsa da táýekelge baryp otyrmyz. Ol zaldy alar bolsaq, merzimdi naqtylaý kerek bolady. Kontserttiń qazan aıynda bolatyny anyq! Qaı zaldy alatynymyz aıqyndalǵan ýaqytta bılet satylymy bastalady. Ol jerde endi bılet baǵasy joǵary bolady», - dedi mınıstr QazAqparat tilshisine elordada «Balýan Sholaq» fılminiń tusaýkeserinde.

Eske sala ketsek, buǵan deıin osy jyldyń kúzinde Nıý-Iorktegi áıgili «Madison Square Garden» alańynda ánshi Dımash Qudaıbergenniń shoý-kontserti ótetinin habarlaǵan bolatynbyz.

«Mádenıet jáne sport mınıstrligi 2019 jyldyń III toqsanynda Nıý-Iorkte álemge áıgili «Madison Square Garden» alańynda Dımash Qudaıbergenniń aıryqsha shoý-kontsertin ótkizbek. Búgingi tańda atalǵan shoýdy uıymdastyrý jumystary bastalyp ketti», - degen edi QazAqparat tilshisine bergen suhbatynda mınıstr.