Arystanbek Muhamedıuly buqaralyq sportty damytýdaǵy kedergilerdi atady
ASTANA. QazAqparat - QR Mádenıet jáne sport mınıstri Arystanbek Muhamedıuly Qazaqstanda buqaralyq sport túrlerin damytýda qandaı kedergiler baryn aıty, dep habarlaıdy QazAqparat tilshisi.
«Men buqaralyq sporttyń damýyna teris áserin tıgizip jatqan máseleler týraly aıta keteıin. Birinshi ári eń mańyzdy máselelerdiń biri - sport ınfraqurylymynyń halyq sanyna saı jetispeýi. Sport ınfraqurylymynyń ósýi - negizinen jattyǵý alańdaryn salý esebinen baıqalady. Al jabyq sport qurylystardyń sany respýblıka boıynsha, ásirese aýyldy jerlerde áli de jetispeıdi. Mysaly, mektepterdiń janyndaǵy sport zaldar tek sabaq ótkizý úshin qoldanylady. Elimizde barlyǵy dene shynyqtyrý zaldary boıynsha 1,5 mln sharshy metr mólsherinde qajettilik bar», - deıdi mınıstr Úkimet otyrysynda.
Arystanbek Muhamedıulynyń aıtýynsha, memlekettik-jekeshelik áriptestik arqyly sporttyq nysandardyń qurylysyndaǵy oń dınamıkany eskermeı ketýge bolmaıdy.
«Bul rette, «Búkilqazaqstandyq kıokýshınkaı karate» respýblıkalyq qoǵamdyq birlestiginiń «Karate ár aýlaǵa» baǵdarlamasy aıasynda óz qarajaty esebinen Qaraǵandy, Aqtaý, Pavlodar qalalarynda salǵan sporttyq kesheni bar balalarǵa arnalǵan sporttyq-saýyqtyrý alańdarynyń qurylysyn atap ótken jón. Sondyqtan, halyqty sportpen jappaı shuǵyldanýǵa tartý qajet. Osy arqyly «Sport ár aýlaǵa» jobasymen sporttyq kesheni bar balalarǵa arnalǵan sporttyq-saýyqtyrý alańdarynyń jappaı qurylysy boıynsha sharalar qabyldaý arqyly jumysty kúsheıtýdi usynamyz», - dedi ol.
