Arystanbek Muhamedıuly BAQ ókilderin marapattady
ASTANA. QazAqparat - Elordadaǵy «Qazanat» atshabarynda ornalasqan «Etnoaýyl» ulttyq-mádenı kesheninde QR Mádenıet jáne sport mınıstri Arystanbek Muhamedıuly «Memlekettik til jáne BAQ» atty respýblıkalyq baıqaýynyń jeńimpaz tilshileri men til, mádenıet, sport, týrızm salalaryn nasıhattaýǵa úles qosqan BAQ ókilderin marapattady, dep habarlaıdy QazAqparat tilshisi.
«Ana tilimizge degen qurmetti urpaqtyń sanasyna sińirý - alǵa qoıǵan maqsattarymyzdyń biri. Sondyqtan, osy baıqaýdy uıymdastyrdyq. Jeńimpazdardy anyqtaǵan qazylar alqasyna kóp rahmetimizdi aıtamyz. Qazaqstandaǵy Buqaralyq aqparat quraldary óte ıntellektýaldy ekenin erekshe atap ótkimiz keledi. Barlyqtaryńyzdy Baılanys jáne aqparat qyzmetkerleriniń kúnimen quttyqtaımyn», - dedi Arystanbek Muhamedıuly tilshilerge arnalyp uıymdastyrylǵan saltanatty sharada.
Respýblıkalyq baıqaýǵa 200-ge jýyq materıal kelip túsken. Erejege sáıkes, el aýmaǵyndaǵy BAQ-ta jarııalanǵan jýrnalıstik eńbekterdiń mazmuny memlekettik tildiń qyzmet etý aıasyn keńeıtý, mártebesin nyǵaıtý, qazirgi memlekettik tildiń ahýalyn taldaý jáne oǵan monıtorıng júrgizýge baǵyttalǵan.
Saltanatty shara barysynda mınıstr mádenıet, sport, týrızm salalaryn nasıhattaýǵa úles qosqan BAQ ókilderin Alǵys hat tabys etti. Sonymen qatar, baıqaýdyń qorytyndysy boıynsha «Úzdik maqala», «Úzdik telebaǵdarlama», «Úzdik radıobaǵdarlama», «Úzdik saıt maqalasy» nomınatsııalary boıynsha júldegerler men bas júlde ıesi (1 mıllıon teńge) marapattaldy.
Saltanatty sharanyń sońynda tilshiler qaýymyna arnap, estrada juldyzdary óner kórsetti.
