Arystanbek Muhamedıuly astanalyqtardy Alash jaıly fılmniń tusaýkeserine shaqyrdy
ASTANA. QazAqparat - QR Mádenıet jáne sport mınıstri Arystanbek Muhamedıuly astanalyqtardy «Alash týy astynda» derekti fılmniń tusaýkeserine shaqyrdy. Derekti fılmniń tusaýkeseri 6 qarasha kúni saǵat 19:00 «Saryarqa» kınoteatrynda ótedi, dep habarlaıdy QazAqparat tilshisi.
Derekti fılmdi kórýge kirý tegin. Arnaıy kórsetilim de erteń sol jerde bolady. Fılmdi QR Mádenıet jáne sport mınıstrliginiń tapsyrysy boıynsha Sh. Aımanov atyndaǵy «Qazaqfılm» AQ «El» prodıýserlik ortalyǵymen birlese otyryp túsirgen.
«Fılmdi túsirý toby Alash qaıratkerleriniń izimen Semeıdiń Alash qalasy atalǵan aýmaǵynda, Máskeýdegi Kreml, Sankt-Peterbýrgtegi Dýma otyrystary ótken Tavrııa saraıynda, Smolnyıda, Sankt-Peterbýrg, Qazan ýnıversıtetinde, Ýfadaǵy Memlekettik Májilis ótken burynǵy «Sibir» qonaqúıinde túsirý jumystaryn júrgizdi.
Fılmniń rejısseri - Ergen Toqmýrzın, bas keńesshisi - Mámbet Qoıgeldi, shyǵarmashylyq keńesshisi - Tursynjan Shapaı, stsenarııdiń avtory - Bolat Múrsálim, qoıýshy operatory - Mustafa Óner jáne kompozıtory - Beıbit Aqosh», - dep jazdy mınıstr Feısbýktegi paraqshasynda.
Arystanbek Muhamedıuly qazaqstandyqtardyń fılmdi qaıdan kóre alatyny týraly máseleni sheship jatqanyn tilge tıek etti.
«Kınoteatrda derekti kıno kórsetilmeıtini belgili, sondyqtan memlekettik telearnalardan kórsetý múmkindigin qarastyramyz. Bul týraly mindetti túrde qosymsha habarlaımyn», - dep jazdy ol.
Eske sala ketsek, «Alash týy astynda» atty derekti fılm túsirilgenin buǵan deıin habarlaǵan bolatynbyz.
