Arystanbek Muhamedıuly Asqar Bóribaevtyń qyzmetinen ketýine qatysty pikir bildirdi
«Biz mınıstrlik retinde atalmysh jaıǵa nazar aýdaramyz. Qazir teatrda kadrlyq ózgerister bolyp jatyr. Jańa dırektor usynyldy. Ol jerdegi mán-jaıdyń eki jaǵy bar. Eger bul teatrdyń kórkemdik bólimine qatysty bolsa, biz oǵan mán berýimiz kerek. Jalaqyny kóterý týraly talap arnaıy talqylaýdy qajet etedi», - dedi mınıstr Parlament Senatynda tilshilerdiń suraǵyna jaýap bere otyryp.
Onyń aıtýynsha, búgingi tańda kitaphana qyzmetkerleriniń hor ánshilerine qaraǵanda jalaqysy tómen.
«Shynymdy aıtaıyn, arhıv qyzmetkerleri, kitaphanashylar, muǵalimder hor ártisterine qaraǵanda birneshe ese az jalaqy alady. Sondyqtan, biz máselege týra qaraýymyz kerek. Eger darynyn barynsha shyńdap, kóp ter tógip, alǵa qaraı umtylsa, onda solıst bola otyryp, kóbirek aılyq alýǵa bolady. Jalaqyny kóterý arqyly máseleni jaba salǵan durys emes », - dep atap ótti vedomstvo basshysy.
Mınıstrdiń aıtýynsha, ár adamǵa óz ónerin pash ete alatyndaı múmkindik berilýi kerek.
«Dımashtyń, mysaly, kún saıynǵy jumys tártibi bekitilgen. Ol tipti úıinde de bolmaıdy. Sebebi ol tabysqa jetkisi keledi, ol jumyspen aınalysady. Al úıde jatyp, narazylyq bildirý durys emes. Kórkemdik bólimge qazir jańa basshylyq keldi. Keńesshi retinde Qazaqstan Respýblıkasynyń Halyq ártisi Bazarǵalı Jamanbaıdy tartyp otyrmyz. Biz jalaqyny kóbeıtýge múddelimiz, biraq teatr qyzmetkerlerinen buryn, eń aldymen, arhıv jáne kitaphana qyzmetkerleriniń jalaqysy kóterilýi tıis», - dedi Arystanbek Muhamedıuly.
Mádenıet jáne sport mınıstrligi baspasóz qyzmetiniń habarlaýynsha, Abaı atyndaǵy qazaq Memlekettik akademııalyq Opera jáne balet teatrynyń dırektory jáne kórkemdik jetekshisi Asqar Bóribaev óz erkimen qyzmetinen ketken. Teatrdyń jetekshisi mindetin Asııa Qalıeva atqara turady. Asqar Bóribaev bolsa Jambyl atyndaǵy memlekettik fılarmonııanyń basshylyǵyna aýysqan.
