Arystanbek Muhamedıuly 2019 jyldy marafonmen qarsy alýǵa shaqyrdy
ASTANA. QazAqparat - QR Mádenıet jáne sport mınıstri Arystanbek Muhamedıuly tilek bildirgenderdiń bárin 2019 jyldy marafonmen qarsy alýǵa shaqyrdy, dep habarlaıdy QazAqparat tilshisi.
«QR Mádenıet jáne sport mınıstri Arystanbek Muhamedıuly jańa jyldy qarsy alýda jańa ózgerister engizdi. Kez kelgen marafonǵa ózi qatysatyn mınıstr bıyl da ujymǵa jańa jylda salaýatty ómir saltyn ustanýǵa, sportpen aınalysýǵa, 2019 jyldy sportpen bastaýǵa shaqyrdy», - dep habarlaıdy mınıstrliktiń baspasóz qyzmetinen.
Qala ishinde kólikterdiń jumysyna kedergi keltirmes úshin júgirýdiń baǵyty ózgergen. Naqtyraq aıtqanda, 31 jeltoqsan kúni saǵat 23.00-de mınıstr bastaǵan top Báıterek mańynan «Han Shatyr» OSO-ǵa deıin júgirip ótedi. Qatysýshylar birneshe shaqyrymdy «Sýly-jasyldy» býlvar arqyly eńseredi.
Arystanbek Muhamedıuly bul sharaǵa qatysýǵa elimizge tanymal adamdardy shaqyryp otyr.
