Arystan kelgen balalardy demaldyrýǵa Almatyda qansha aqsha bólindi
Bul týraly qalalyq máslıhat sessııasynda Strategııa men bıýdjet basqarmasy basshysynyń mindetin atqarýshy Janar Jazyltaeva málimdedi.
«Arys qalasynyń japa shekken turǵyndaryna kómek retinde Almatydaǵy »Órnek« lagerine 225 bala men 14 tárbıeshi 40 kúnge demalýǵa jiberildi. Bul úshin jergilikti bıýdjetten 14,4 mln teńge bólindi»,- dedi Janar Jazyltaeva.
Buǵan deıin 4 myńǵa jýyq Arys balalary Qazaqstannyń jazǵy lagerlerinde demalatynyn habarlaǵan bolatynbyz.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Sonyń saldarynan úsh adam qaza tapty, 170-ke jýyq adam zardap shekti. 20-ǵa jýyq úı, 9 qora-qopsy janyp ketti. Úı-jaılar men ǵımarattardyń 80-90 paıyzyna ártúrli deńgeıde zaqym keldi.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken turǵyndarmen kezdesti. Memleket basshysy qalany qalpyna keltirýdi tapsyrdy.
