Arystan arsenaldy shyǵarý jumystary bastaldy - Qorǵanys mınıstri

NUR-SULTAN. QazAqparat - Arystan arsenaldy shyǵarý jumystary bastaldy. Bul týraly Senatta tilshiler saýalyna jaýap berý kezinde QR Qorǵanys mınıstri Nurlan Ermekbaev málim etti, dep habarlaıdy QazAqparat tilshisi.

«Arys qalasynan bul arsenaldy shyǵarý jumystary bastaldy. 90 jyl boıy turǵan arsenaldy bir kúnde kóshirý ońaı emes, ol jerde kóp kólemde oq-dári jınaqtalǵan. Ol úshin basqa da qaýipsiz jerlerde alańdar men qoımalardy daıyndaý kerek bolady», - dedi mınıstr.

Onyń sózine qaraǵanda, bul baǵytta tıisti qarjy shyǵyny qajet, ıaǵnı kólik, vagondar, konteınerler, kúzet sharalary qajet bolady.

«Osy oraıda tasymaldaý men arsenal ornalasatyn jerde biz júz paıyzdyq qaýipsizdikti qamtamasyz etýimiz kerek. Bul jumystarǵa tolyqtaı kiristik, oq-dári bóligin shyǵarý bastaldy dep aıtýǵa bolady. Osy jumystar qansha ýaqyt alatynyn qazir aıtý qıyndaý. Eń bastysy, tıisti jumystardyń barysynda Arys turǵyndarynyń jáne barsha azamattardyń qaýipsizdigi qamtamasyz etiledi. Oq-dári qaýipsiz saqtalatyn oryndarǵa jetkiziledi, ondaı nysandar Qazaqstanda barshylyq», - dedi Nurlan Ermekbaev.

Budan buryn habarlanǵandaı, Nurlan Ermekbaev Arystaǵy jarylys boıynsha tergeý amaldary shamamen bir aıdyń ishinde aıaqtalatynyn atap ótti.

Sonymen qatar mınıstr eshbir eldi mekenniń mańynda artıllerııalyq oq-dári bolmaıtynyn málimdedi.