Arystaǵy jarylystan es jııýǵa «Bastaý Bıznes» kómektesti – jas kásipker

NUR-SULTAN. QazAqparat – Túrkistan oblysynyń turǵyny «Bastaý Bıznes» baǵdarlamasy arqyly Arystaǵy jarylystan keıin otbasylyq bıznesin qalaı ashqanyn aıtyp berdi, dep habarlaıdy QazAqparat tilshisi.

«Bastaý bıznes» baǵdarlamasy 5 jyldyǵyna arnalǵan forýmda Jadyra Dúısenhan esimdi jas kásipker óz kásibin qalaı bastaǵanyn aıtyp berdi. Bul kásipkerdiń jasaǵan ónimi Túrkistan, Atyraý, Shymkent jáne Almaty qalalaryndaǵy qurylys kompanııalarynyń qyzmetkerleri tutynyp júr.

«Men – Arys qalasynyń turǵynymyn. Jasym 24-te. Ózim eki balanyń anasymyn. «Bastaý Bıznes» týraly alǵash ret Arys qalasynda boǵan jarylystan keıin estidim. Joldasymyz ekeýmiz de jumyssyz qalǵan bolatynbyz. Qandaı ispen aınalysýdy bilmeı, oılanyp júrgende osy joba týraly ınternetten kórip, ótinish qaldyrdyq. Sol ótinishimiz qabyldanyp, sertıfıkatyn ıemdendik. Keıinnen osy sertıfıkat arqyly ómirimizde úlken bir jaryq sáýle paıda boldy desem bolady. Birinshiden, ózime degen senimdiligim artty. Dál osyndaı qurylys qolǵaby sııaqty úlken kúrdeli jobany tańdaýyma túrtki boldy», - dedi jas kásipker.

Onyń aıtýynsha, keıin bul jobasy otbasylyq bızneske aınalǵan.

«Áý basta 2 toqý stanogymen bastasam, «2020 jyldyń ekinshi jartysynda 4,5 mln teńge kóleminde ınnovatsııalyq grant aldym. Qazirgi tańda 5 stanokpen 20 myń qurylys qolǵabyn óndirip otyrmyn. Aldaǵy josparym – 20 myń qurylys qolǵabyn 100 myńǵa deıin kóbeıtý», - dedi Jadyra Dúısenhan.