Arystaǵy jarylys: Jedel shtab qurylyp, japa shekkenderge barlyq kómek kórsetilýde
«Osy ýaqyttaǵy jaǵdaı boıynsha, oblystyń medıtsınalyq mekemelerine zardap shekken 31 adam jetkizildi. Sońǵy málimetter naqtylanýda», - delingen basqarma aqparatynda.
Naýqastardyń basym bóligi Oblystyq klınıkalyq aýrýhanada jatyr. Olarǵa barlyq qajetti medıtsınalyq kómek kórsetilýde. Arystaǵy tótenshe jaǵdaıǵa oraı Ordabasy aýdanynda medıtsınalyq shtab quryldy.
Túrkistan oblysy Densaýlyq saqtaý basqarmasynyń basshysy Muqan Egizbaevtyń basqarýymen shuǵyl jumystar júrgizilip jatyr. Ordabasy aýdandyq ortalyq aýrýhanada jáne Oblystyq klınıkalyq aýrýhanada 200-den astam naýqasqa arnalǵan oryn daıyndaldy.
Jedel járdem brıgadasynyń 30 kóligi Shymkent qalasyna kirer 3 jolǵa qoıyldy. Qajet bolǵan jaǵdaıda birneshe aýdandardan aldyrylǵan qosymsha jedel járdem kólikteri daıyn.
«Oblystyq klınıkalyq aýrýhanadan travmatolog, hırýrg, reanımatolog dárigerler qurylǵan medıtsınalyq shtabqa jınaldy. Qazirgi kezde jaraqat alǵandar joq. Evakýatsııa jumystary júrgizilip jatyr. Arys qalalyq ortalyq aýrýhanasy men emhanasynan naýqastar evakýatsııalandy. Mamandar da jedel járdem kólikteri de oblys boıynsha jetkilikti», - delingen aqparatta.
Aıta keteıik, buǵan deıin zardap shekken 11 adam Shymkent aýrýhanasyna jetkizilgen bolatyn.
Búgin tańerteń Túrkistan oblysynyń Arys qalasyndaǵy áskerı bólim qoımasynda jarylys boldy. Birneshe óńirdiń Tótenshe jaǵdaılar departamenti shuǵyl jeliler qurdy. Kóp uzamaı oblys basshysy Ómirzaq Shókeev bastaǵan arnaıy komıssııa Arystaǵy áskerı bólimge attandy.Jaǵdaıdyń aýqymymen tanysqan óńir ákimi Arys turǵyndaryn evakýatsııalaý týraly sheshim qabyldanǵanyn málim etti. QR ІІM Tótenshe jaǵdaılar komıteti turǵyndar qaıda jáne qalaı evakýatsııalanyp jatqanyn habarlady.
QR Prezıdenti Qasym-Jomart Toqaev tıisti organdarǵa Arystaǵy tótenshe jaǵdaıdyń zardaptaryn joıý týraly tapsyrma berdi.
QR Qorǵanys mınıstrligi resmı aqparat taratyp, túske deıingi ýaqyttaǵy jaǵdaı boıynsha zardap shekkender joqtyǵyn aıtty. Keıin habarlanǵandaı, oqıǵa ornyna Qorǵanys mınıstri Nurlan Ermekbaev ushyp shyqty.
