Arystaǵy jarylys týraly fılm jaryqqa shyqty

NUR-SULTAN. QazAqparat - Áleýmettik jelilerde Arystaǵy jarylys kezindegi syn saǵattardy sıpattaǵan jańa fılm jarııalandy, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

«Fılmniń sıýjeti Arys qalasyndaǵy áskerı qoımalarda bolǵan jarylys saldarynan halyqtyń bastan ótkergen qıyn sátterin beıneleıdi. Beınematerıalda ataqonysynan ketýge májbúr bolǵan qala turǵyndary óz qaıǵylarymen bólisti. Al áskerı órt sóndirýshiler apat ornynda órtti qalaı aýyzdyqtaǵanyn, týǵan-týystaryn izdep qalaı janushyrǵanyn aıtady» delingen habarlamada.

Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskerı qyzmetshi. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.

Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.