Arystaǵy jarylys: Sot prokýrorlardyń qarsylyǵyna qaramastan, isti qaraýdy keıinge qaldyrdy

ShYMKENT. QazAqparat – Arystaǵy jarylys boıynsha isti sotta qaraý basqa kúnge qaldyryldy. Shymkent garnızony áskerı soty prokýrorlardyń qarsylyǵyna qaramastan, osyndaı sheshimge keldi, dep habarlaıdy QazAqparat tilshisi.

Shymkent garnızony áskerı sotynyń málimetinshe, atyshýly qylmystyq is boıynsha prokýror birneshe sottalýshyǵa qol qoıylmaǵan aıyptaý aktisin tabys etken. Al, 11 maýsym kúni prokýrorlar árbir sottalýshyǵa taǵylǵan aıyptyń mánin jarııa ete bastaǵan bolatyn. Alaıda birqatar sottalýshylar men olardyń advokattary tóraǵalyq etýshi sýdıaǵa prokýrordyń qol qoımaǵan aıyptaý aktisin tapsyrǵanyn aıtqan.

«QPK 304-babyna sáıkes, prokýrorǵa aıyptaý aktisin alǵany týraly qolhatpen aıyptalýshyǵa tabys etýdi qamtamasyz etý júkteledi. Tekserý barysynda aıyptalshylardyń qorǵaýshylary tarapynan joǵaryda atalǵan ýájderi rastalǵan. Osyǵan baılanysty sotqa tóraǵalyq etýshi sýdıa prokýrorlardyń qarsylyǵyna qaramastan, prokýrorlardy aıyptaý aktisin tapsyrý boıynsha sharalar qabyldaýǵa mindettegen. Sot otyrysyn qaraýdy basqa kúnge qaldyrdy», delingen habarlamada.