Arystaǵy jarylys: Shymkent ákimi turǵyndardy sabyrlyq saqtaýǵa shaqyrdy
«Arystaǵy qaıǵyly jaǵdaı. Qarý-jaraq qoımasyndaǵy órt. Biz turǵyndardy evakýatsııalaý úshin jedel járdem kólikteri men avtobýstardy jiberdik. Qajet bolǵan jaǵdaıda kómek úshin volonterlardy tarta alamyz. Ázirge onyń keregi joq. Bárin sabyrǵa shaqyra otyryp, jarylystyń toqtaýy úshin syıynýǵa shaqyramyn», - dep jazdy Ǵabıdolla Ábdirahymov Instagram paraqshasynda.
Qala basshysynyń aıtýyna qaraǵanda, Shymkent úshin eshqandaı qaýip joq. Sonymen qatar, ol ákimdiktiń arystyqtarǵa kómektesip jatqanyn habarlady.
Eske sala ketsek, buǵan deıin áleýmettik jelide áskerılerdiń Arys qalasynda halyqty evakýatsııalap jatqan vıdeosy taraǵan bolatyn.
Búgin tańerteń Túrkistan oblysynyń Arys qalasyndaǵy áskerı bólim qoımasynda jarylys boldy. Birneshe óńirdiń Tótenshe jaǵdaılar departamenti shuǵyl jeliler qurdy. Kóp uzamaı oblys basshysy Ómirzaq Shókeev bastaǵan arnaıy komıssııa Arystaǵy áskerı bólimge attandy.Jaǵdaıdyń aýqymymen tanysqan óńir ákimi Arys turǵyndaryn evakýatsııalaý týraly sheshim qabyldanǵanyn málim etti. QR ІІM Tótenshe jaǵdaılar komıteti turǵyndar qaıda jáne qalaı evakýatsııalanyp jatqanyn habarlady.
QR Prezıdenti Qasym-Jomart Toqaev tıisti organdarǵa Arystaǵy tótenshe jaǵdaıdyń zardaptaryn joıý týraly tapsyrma berdi.
QR Qorǵanys mınıstrligi resmı aqparat taratyp, túske deıingi ýaqyttaǵy jaǵdaı boıynsha zardap shekkender joqtyǵyn aıtty. Keıin habarlanǵandaı, oqıǵa ornyna Qorǵanys mınıstri Nurlan Ermekbaev ushyp shyqty.
Oqıǵa saldarynan zardap shekken 11 adam Shymkent aýrýhanasyna jetkizildi.
Túrkistan oblysynyń aýrýhanalaryna 31 adam tústi.
