Arystaǵy jarylys: Oralda 3 kómek kórsetý ortalyǵy ashyldy
Oral qalasynda úsh jerde kómek kórsetý ortalyqtary ashyldy.
Qazirgi ýaqytta osy oryndarda (N.Nazarbaev dańǵyly, 188, 1-qabat, 101-kabınet, Qadyr Myrza Álı, 18, 3-qabat, «Bastaý» kovorkıng ortalyǵy jáne J.Moldaǵalıev kóshesi, 19, 1-qabat, 109-kabınet) Arys turǵyndaryna asa qajetti zattar jınaqtalýda.
Oblys ákiminiń orynbasary Ǵabıdolla Ospanqulov óńirde qazirdiń ózinde 15-20 iri kásiporyn Arysqa demeýshilik kórsetip jatqandyǵyn jetkizdi. Sonymen qatar oblys ákimdigi, «Nur Otan» partııasy BQO fılıaly jáne basqa memlekettik mekemeler qyzmetkerleri óz erikterimen bir kúndik jalaqylaryn aýdarmaqshy.
Oblystyq kásipkerlik jáne ındýstrıaldyq-ınnovatsııalyq damý basqarmasynyń bólim basshysy Meıram Qabdyǵalıevtiń aıtýynsha, búgin alǵashqy júk kóligi attanbaqshy. Onda 4 tonna astyq, 5 tonna makaron jáne basqa azyq-túlik ónimderi tıelgen. Arysqa sondaı-aq qurylys materıaldary da jetkizilmekshi. Buǵan «Kýbleı», «Jaıyq et», «Oral transformator zaýyty», «Terekti maı» syndy kásiporyndar óz úlesterin qosýda.
