Arystaǵy jarylys: On alty áskerı qyzmetshi 97 mlrd teńge shyǵyndy óteıdi
«Qazaqstan Respýblıkasynyń Qorǵanys mınıstrligi (budan ári - talapker, mınıstrlik) 2019 jylǵy 24 maýsymda Arys qalasynda oq-dárilerdiń jarylýy saldarynan týyndaǵan 97 mlrd teńgeden astam zalaldy 16 jaýapkerden memleket kirisine óndirip alý týraly talap aryzben sotqa júgindi. Jaýap berýshiler - burynǵy áskerı qyzmetshiler. Olar qyzmet barysynda órt qaýipsizdigi, oq-dárilerdi saqtaý, ótkizý jáne kádege jaratý, tehnıkalyq baqylaý úshin jaýapty boldy. Bir jaýap berýshi kúzet-órt dabylyn ornatýdy júzege asyrǵan JShS basshysy sanalady», - delingen aýdandyq sot taratqan aqparatta.
Taratylǵan málimetke sáıkes, oq-dári jarylysyn jaýap berýshilerdiń barlyǵynyń kinási Shymkent garnızony Áskerı sotynyń 2019 jylǵy 24 maýsymdaǵy zańdy kúshine engen úkimimen anyqtalǵan. Osy úkimmen mınıstrlikke azamattyq sot isin júrgizý tártibimen múliktik talaptardy qanaǵattandyrý quqyǵy berilgen. Talapkerdiń talaby jarylys saldarynan Qazaqstan Respýblıkasy Qarýly Kúshteriniń, 44859-áskerı bólimniń, 16752-áskerı bólimniń, 74884-áskerı bólimniń teńgerimindegi ǵımarattardy, qurylystardy, ınfraqurylymdy buzý, oq-dárilerdi joıý túrinde memleketke múliktik zalal keltirilgendigimen negizdelgen. Sot taǵaıyndaǵan saraptamanyń qorytyndysyna sáıkes, zalaldyń jalpy somasy 96 373 286 573, 37 teńgeni quraıdy.
«QR Azamattyq kodeksiniń 932-babynda birlesip keltirilgen zııan úshin jaýapkershilik kózdelgen. Birlesip zııan keltirgen adamdar jábirlenýshiniń aldynda birge jaýap beredi. Sot belgilengen jaǵdaılardy eskere otyryp, talap qoıýdy qanaǵattandyrý týraly qorytyndyǵa keldi. Astana qalasy Esil aýdandyq sotynyń 2022 jylǵy 19 qazandaǵy sheshimimen jaýap berýshilerden memleket kirisine sot saraptamasyna sáıkes, zalal men sot shyǵyndary yntymaqty tártippen óndirildi. Sot sheshimi zańdy kúshine engen joq», - dep atap ótedi sottan.
