Arystaǵy jarylys: Bógen sý qoımasyna qatysty aqparat jalǵan

ARYS. QazAqparat - Túrkistan oblysy Arys qalasyndaǵy jarylys saldarynan «Bógen» sý qoımasyna qaýip týyndaǵany týraly aqparat jalǵan. Bul týraly Túrkistan oblysy ákiminiń baspasóz qyzmetinen málim etti, dep habarlaıdy QazAqparat.

«Qazirgi tańda kóptep tarap jatqan «Bógen» sý qoımasynan keletin qaýip týraly aqparattyń jalǵan ekenin málimdeımiz», - dedi ákimdikten.

Buǵan deıin habarlaǵanymyzdaı, Túrkistan oblysynyń ákimi Ómirzaq Shókeev bastaǵan arnaıy komıssııa oqıǵa ornynda júr.

Arnaıy shtab qurylyp, áskerıler men quqyqqorǵaý organdary TJ aımaǵyna kelip jetti. Oblys ákiminiń tapsyrmasyna sáıkes, turǵyndar:

1.Aqdala burylysy

2. 41-razez

3. «Vodozobor» baǵytynda lagerlerge ornalastyrylady.

«Atalǵan úsh baǵyt boıynsha áskerı kólikter, kamazdar men arnaıy jasaq jumyldyrylýda. Lager basynda turǵyndardy aýdan ákimderi qarsy alyp, jaıǵastyrady. Áleýmettik nysandardy (aýrýhana, balalar) polıtsııa qyzmetkerleri kóshirýde. Sondaı-aq,Otyrar men Ordabasy aýdandarynda 100 oryndyq eki gospıtal ashyldy. Qosymsha 30 jedel medıtsınalyq kóligi jumys isteýde», - dedi oblys ákimdiginen.

Búgin tańerteń Túrkistan oblysynyń Arys qalasyndaǵy áskerı bólim qoımasynda jarylys boldy. Birneshe óńirdiń Tótenshe jaǵdaılar departamenti shuǵyl jeliler qurdy. Kóp uzamaı oblys basshysy Ómirzaq Shókeev bastaǵan arnaıy komıssııa Arystaǵy áskerı bólimge attandy. Jaǵdaıdyń aýqymymen tanysqan óńir ákimi Arys turǵyndaryn evakýatsııalaý týraly sheshim qabyldanǵanyn málim etti. QR ІІM Tótenshe jaǵdaılar komıteti turǵyndar qaıda jáne qalaı evakýatsııalanyp jatqanyn habarlady.

QR Prezıdenti Qasym-Jomart Toqaev tıisti organdarǵa Arystaǵy tótenshe jaǵdaıdyń zardaptaryn joıý týraly tapsyrma berdi.

QR Qorǵanys mınıstrligi resmı aqparat taratyp, túske deıingi ýaqyttaǵy jaǵdaı boıynsha zardap shekkender joqtyǵyn aıtty. Keıin habarlanǵandaı, oqıǵa ornyna Qorǵanys mınıstri Nurlan Ermekbaev ushyp shyqty.