Arystaǵy jarylys: Bógen sý qoımasyna eshqandaı qaýip tónip turǵan joq

ARYS. QazAqparat - Arystaǵy jarylysqa baılanysty Bógen sý qoımasyna eshqandaı da qaýip tónip turǵan joq. Bul týraly Túrkistan oblysy aýyl sharýashylyǵy basqarmasynyń basshysy Nurbek Badraqov málim etti. Onyń vıdeo-málimdemesin oblys ákiminiń keńesshisi Sáken Qalqamanov áleýmettik jelide jarııalaǵan bolatyn.

Basqarma basshysy vıdeojazbasy arqyly Arys qalasyndaǵy tótenshe jaǵdaıǵa baılanysty Bógen sý qoımasyna qatysty taraǵan qaýesetti joqqa shyǵarady. «Arys arnasynan sekýndyna 47 tekshe metr sý sharýalardy aǵynsýmen qamtamasyz etýge bosatylyp jatyr. Bógen sý qoımasyna baılanysty eshqandaı da qaýip joq. Osynda Túrkistan oblysy «Nur Otan» partııasy fılıaly tóraǵasynyń birinshi orynbasary Nurmahan Joldasov pen Otyrar aýdandyq Tótenshe jaǵdaılar basqarmasynyń mamandary tolyǵymen Bógen sý qoımasyn kórip shyqty. Bógen sý qoımasyna qatysty eshqandaı da qaýip tónip turǵan joq», dedi N. Badraqov.

Búgin tańerteń Túrkistan oblysynyń Arys qalasyndaǵy áskerı bólim qoımasynda jarylys boldy. Birneshe óńirdiń Tótenshe jaǵdaılar departamenti shuǵyl jeliler qurdy. Kóp uzamaı oblys basshysy Ómirzaq Shókeev bastaǵan arnaıy komıssııa Arystaǵy áskerı bólimge attandy. Jaǵdaıdyń aýqymymen tanysqan óńir ákimi Arys turǵyndaryn evakýatsııalaý týraly sheshim qabyldanǵanyn málim etti. QR ІІM Tótenshe jaǵdaılar komıteti turǵyndar qaıda jáne qalaı evakýatsııalanyp jatqanyn habarlady.

QR Prezıdenti Qasym-Jomart Toqaev tıisti organdarǵa Arystaǵy tótenshe jaǵdaıdyń zardaptaryn joıý týraly tapsyrma berdi.

QR Qorǵanys mınıstrligi resmı aqparat taratyp, túske deıingi ýaqyttaǵy jaǵdaı boıynsha zardap shekkender joqtyǵyn aıtty. Keıin habarlanǵandaı, oqıǵa ornyna Qorǵanys mınıstri Nurlan Ermekbaev ushyp shyqty.

Sońǵy málimetter boıynsha, oqıǵa saldarynan 11 adam zardap shekti.