Arystaǵy jaǵdaı birligi jarasqan el ekenimizdi kórsetti – Ómirzaq Shókeev

TÚRKІSTAN.QazAqparat – Ótken jyly Arys qalasynda bolǵan jarylystan keıingi júrgizilgen jumystardyń nátıjesinde 7 634 nysan qaıta qalpyna keltirilip, jańadan qurylystar salyndy.

Taǵy 68 áleýmettik nysan qaıta qalpyna keltirildi. Bul týraly Túrkistan oblysynyń ákimi Ómirzaq Shókeev eseptik jıynynda málimdedi, dep habarlaıdy QazAqparat tilshisi.

Aımaq basshysynyń aıtýynsha, Arystaǵy jaǵdaı barsha qazaqstandyqtardy biriktirdi. Apattyń saldaryn joıýǵa búkil respýblıka atsalysty.

«Arys oqıǵasy halqymyzdyń bereke-birligin, yntymaqty el ekenin aıqyndady. Apattan keıin búkil qazaq eli Arys halqynyń qaıǵy-muńyn bólisip, qol ushyn sozdy. Bul jaǵdaı Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń jáne Memleket basshysy Qasym-Jomart Toqaevtyń qatań baqylaýynda boldy. El birliginiń arqasynda «jumyla kótergen júk jeńil degendeı» bul synnan da súrinbeı óttik»,- dedi Ómirzaq Shókeev.

Óńir basshysynyń sózinshe, búginde Arys qalasyndaǵy kósheler qaıta jóndeýden ótken. Shaǵyn shaharda abattandyrý, jaıaý júrginshiler joly men jaryqtandyrý jumystary júrgizilgen. Atalǵan aýqymdy jumystardyń nátıjesinde qala odan ári kórkeıip, jańa keıipke endi.

«Arys qalasyn qalpyna keltirý jumystaryna atsalysqan barlyq oblys, qala ákimderine, tıisti mınıstrlikter men ulttyq kompanııa basshylaryna, úkimettik emes uıymdar men partııalarǵa jáne syn saǵatta qoldaý kórsetken qazaqstandyqtarǵa alǵys bildiremin!»,- dedi Ómirzaq Estaıuly.