Arystaǵy tazalaý jumystary taǵy 2 aıǵa sozylýy múmkin - mınıstr
«Qazir Arysta mobıldi toptar men saperler toby turaqty jumys isteýde. Ózderi tekserý júrgizip, qaýipti zattardy alady. Tabylǵan qaldyqtardyń 90 paıyzy qaýipsiz, olar - jaı ǵana metall synyqtary. Biraq, keıbir zattardy keskende nemese otqa salǵanda qaýip týdyrýy múmkin. Sondyqtan, baǵaly metall dep qunyqpaı, mamandardy shaqyrǵan jón», - dedi mınıstr Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, negizgi jumystar áskerı bólim aınalasynda jáne arsenal ishinde júrip jatyr jáne tazalaý jumystary taǵy 1-2 aıǵa sozylýy múmkin.
«Elbasy tapsyrmasymen qalǵan oq-dáriler arsenaldan shyǵarylady jáne qaýipsiz qoımalarǵa taratylady. Nemese tıisti organdarǵa ýtılızatsııaǵa beriledi nemese qaladan 60 shaqyrym jerde jarý jolymen joıylady», - dedi N. Ermekbaev.
Tekserý jumystary aıaqtalǵan soń, qansha tonna oq-dáriniń jarylyp ketkeni jáne qansha shyǵyn kelgeni anyqtalady.
«Oq-dárilerdiń jartysynan astamy jarylyp ketti. Órt sóndirýshiler ekinshi jáne úshinshi bazadaǵy órtti sóndirý arqyly, ınjenerlik oq-dárilerdi saqtap qaldy (...) Arsenalda avıatsııalyq snarıadtar men teńiz oq-dárileri eshqashan saqtalmaǵan», - dep túsindirdi mınıstr.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskerı qyzmetshi. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondaı-aq Elbasy Nursultan Nazarbaev Arystaǵy jaǵdaıǵa alańdaýshylyq bildirdi. Tuńǵysh Prezıdenttiń tóraǵalyǵymen Qaýipsizdik keńesiniń otyrysy ótip, onda Arys qalasyndaǵy ahýal talqylandy.
Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletinin aıtty. Keltirilgen zalaldyń kólemi baǵalanyp, Úkimet rezervinen aqsha bólinedi.
Evakýatsııalaý kezinde myńnan astam ata-ana balarynan kóz jazyp qaldy. Sábılerdiń barlyǵy týys-týǵandaryna din-aman tapsyryldy.
Fakti boıynsha qylmystyq is qozǵady.