Arystaǵy mal qorymynda Sibir jarasyna qatysty esh qaýip joq

ARYS. QazAqparat - Arys qalasy aımaǵynda ornalasqan mal qorymdarynda Sibir jarasyna qatysty eshbir qaýip anyqtalmaǵan, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Arys qalasynda 2 qorym bar. Biri – Dermene, ekinshisi – Qojatoǵaı aýyl okrýgi aımaǵynda ornalasqan. Ekeýi de sala mamandarynyń qatań baqylaýynda. Búgin bul týraly Arys qalalyq aýmaqtyq ınspektsııa basshysy Ómirqul Omarov qalalyq ákimdiktiń májilis zalynda ótken brıfıngte málimdedi.

«Qazirgi tańda mal qorymdary zaqymdanbaǵan. Barlyq talaptarǵa saı saqtaýly. Olar únemi veterınarııa qyzmetkerleriniń qadaǵalaýynda. Qorymdarǵa jyl saıyn monıtorıng júrgiziledi. Sol aýmaqtaǵy topyraqtan udaıy synaq alynyp otyrady. Barlyq zertteýlerdiń nátıjesi boıynsha eshbir qaýip anyqtalmaǵan. Jalpy búginge deıin qorymdardan sibir jarasyna qatysty eshqandaı málimet tirkelmegen», - dedi Ómirqul Omarov.