Arystaǵy qurylys máselesi «Nur Otan» partııasynyń baqylaýynda bolady
Májiliske Arys qalalyq máslıhatynyń hatshysy, máslıhat depýtattary, qurylysqa jaýapty mekeme basshylary, partııa belsendileri qatysty.
Jıyndy ashqan «Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaev Arys qalasyn qalpyna keltirý jumystarynyń barysy oblys ákimi men «Nur Otan» partııasynyń únemi nazarynda ekenin atap ótti.
«Nur Otan» partııasy Túrkistan oblystyq fılıaly Arys qalasynda bolǵan tótenshe jaǵdaıǵa baılanysty turǵyndardan túsken aryz-shaǵymdardyń oń sheshilýine yqpal etetin bolady. Búginde oblystyq fılıalǵa qala turǵyndarynan 175 shaǵym túsip, onyń 126-y oń sheshimin tapty. Qazirgi tańda 49 másele qaralýda. Arys qalasynda qurylysy tolyq bitken baspanalar 90,7 paıyzǵa jetti.
Jarylystan zardap shekken shahardy qalpyna keltirý keste boıynsha júrgizilýde. Biraq búgingi tańda úı ıeleriniń kelisim bermeýine baılanysty 53 baspanada qurylys bastalmaǵan. Endigi kezekte biz turǵyndardyń talap-tilegin tyńdap, ótinishterine qulaq asatyn bolamyz», dedi «Nur Otan» partııasy Túrkistan oblystyq fılıaly tóraǵasynyń birinshi orynbasary B. Tájibaev.
Aıta keteıik, ótken aıda «Nur Otan» partııasy tóraǵasynyń Birinshi orynbasary Baýyrjan Baıbek Arys qalasyna arnaıy kelip, qaladaǵy qalpyna keltirý jumystarymen tanysqan edi. Sondaı-aq turǵyndarmen kezdesip, arystyqtarǵa memleket tarapynan jan-jaqty kómek kórsetiletinin atap ótken bolatyn. Osy oraıda, «Nur Otan» partııasynyń Túrkistan oblystyq fılıaly tóraǵasynyń birinshi orynbasary B.Tájibaev májilisten soń birden qaladaǵy 9, 12 sektor jumysyn baqylap, turǵyn úılerdi aralady.
Jalpy, Arys qalasynda turǵyn úı sany – 8634. Tótenshe jaǵdaıdan keıin jóndeý jumystaryn qajet etetini 7197 quraıdy. Al 433 baspana tolyq qalpyna keltirilmek. Sonyń ishinde jańadan 420 jeke turǵyn úı men 3 kópqabatty úıdi qaıta soǵý jumystary júrgizilýde. Árbir sektordaǵy jumystardy júrgizý úshin oblys, qalalardan 7579, aýdandardan 315 jumysshy tartylǵan.
