Arystaǵy halyqqa qyzmet kórsetý ortalyǵy jumysyn bastady

ARYS. QazAqparat – «Azamattarǵa arnalǵan úkimet» Arys qalasyndaǵy halyqqa qyzmet kórsetý ortalyǵyn iske qosty. Jarylystan zardap shekken HQO ornalasqan ǵımarattyń ishi-syrty az ýaqyt ishinde qalpyna keltirilip, jumys oryndary retteldi, dep habarlaıdy QazAqparat vedomstvonyń baspasóz qyzmetine silteme jasap.

«Azamattarǵa arnalǵan úkimet» memlekettik korporatsııasy 634 memlekettik qyzmet túrin kórsetedi.

«Arystaǵy halyqqa qyzmet kórsetý ortalyǵy men ondaǵy áleýmettik tólemderdi esepteý, jer kadastry, jyljymaıtyn múlik qujattaryn retteý bólimderi de qaıtadan óz jumysyn bastady. Ondaǵy baılanys jelileri qalpyna keltirilip, HQO aqparattyq júıesi iske qosyldy. Turǵyndar búginde kerekti anyqtamalardy alyp, jeke bas kýáligi, balalardyń týý kýálikteri sııaqty qujattaryn retke keltire alady» delingen habarlamada.

Aıta keteıik, memlekettik korporatsııanyń Arys qalasyndaǵy bólimshesinde 55 qyzmetker jumys isteıdi. Olardyń barlyǵy búginde jumysqa shyǵyp, laýazymdyq mindetterin atqaryp jatyr.

Buǵan deıin memlekettik qyzmetterdiń kórsetilýin Arysta 5 mobıldi HQO qamtamasyz etip, halyqty qujattandyrý jumystary júrgizilgen bolatyn.