Arystaǵy búgingi jarylys úshin alańdaýǵa negiz joq - vıtse-mınıstr

ARYS. QazAqparat - Arystaǵy áskerı arsenalǵa irgeles aýmaqta oryn alǵan jarylystan japa shekkender joq. Órt oshaǵy áskerı órt sóndirýshiler kúshimen sóndirildi. Bul týraly Arys qalasynda ótken brıfıngte QR Qorǵanys mınıstriniń orynbasary Baqyt Qurmanbaev aıty, dep habarlaıdy QazAqparat tilshisi.

Baqyt Qurmanbaevtyń aıtýynsha, jarylys QR Qorǵanys mınıstrligi ınjenerlik-saperlik bólimsheleriniń oq-dári fragmentterin jınaý kezinde oryn alǵan.

«Alańdaýǵa negiz joq. Terrıtorııany tazalaý jumystary júrip jatyr. Qaýipsizdikti saqtaý turǵysynda barlyq sharalar jasalýda. Áskerı órt sóndirýshilerdiń kúshimen órt oshaǵy sóndirildi»,- dedi Baqyt Qurmanbaev.

Sondaı-aq, Baqyt Januzaquly jergilikti turǵyndardy alańdamaýǵa shaqyrdy. Al, oblystyq Tótenshe jaǵdaılar departamentiniń bastyǵy Nurǵalı Júnisov qaladaǵy tótenshe jaǵdaıdyń turaqty ekenin aıtty.

«Arys qalasynda órt qaýipsizdigi boıynsha jaǵdaı qalypty. Azamat qorǵaý organdary qyzmetkerlerinen 80 adam, 21 tehnıka jumys isteýde. 9 órt sóndirý avtokóligi men 45 órt sóndirýshi Qorǵanys mınıstrliginiń qyzmetkerlerimen birlesip jumys atqarýda»,- dedi Nurǵalı Júnisov.

Brıfıngte oblystyq aýrýhananyń bas dárigeri Marat Pashımov 17 aýmaqqa bólingen arys qalasynda jedel-járdem qyzmeti júıeli jumys jasap jatqandyǵyn jetkizdi. Sondaı-aq, mamandar kóshelerden, úılerden oq-dári qaldyqtary tabylǵan jaǵdaıda qolmen ustaýǵa bolmaıtynyn eskertip, birden 102 nemese 119 nómerine habarlasý qajettigin eskertti.