Arystaǵy apat: Urlyq boıynsha 85 aryz túsken
Bul týraly tótenshe jaǵdaılar komıtetiniń tóraǵasy Valımır Bekker ortalyq kommýnıkatsııalar qyzmetinde ótken brıfıngte aıtty.
«Úıine qaıtqan turǵyndar múlki joǵalǵany týraly 85 aryz túsirgen. Alaıda, onnan astam aryzdy ıeleri qaıtaryp aldy. Asa iri kólemde azyq-túlik urlaý faktisi tirkeldi. Bir adam kóligi urlanǵanyn habarlaǵan. Jalpy, ár oqıǵa boıynsha jedel-izdestirý toptary shuǵyl sharalar qabyldap jatyr», - deıdi Vladımır Bekker.
Onyń aıtýyna qaraǵanda, 28 maýsymnan beri turǵyndardyń shaǵymdary boıynsha jedel áreket etetin 48 tekserý toby jumys istep jatyr.
Eske salsaq, QR Qorǵanys mınıstrligi keshe Arys qalasynda jarylý qaýpi joq qarý-jaraq bólshekterin joıý jumystaryn bastaǵan bolatyn.
Buǵan deıin Túrkistan oblysy ákiminiń orynbasary Joldymurat Amanbaev apattan zardap shekken Arys turǵyndarynyń árqaısyna 100 myń teńgeden tóleý úshin eki aptanyń ishinde 44 myńnan asa adam týraly málimet jınalatynyn aıtqan bolatyn.
Búgingi tańda búlingen 247 jeke úı jóndelýde.
