Arystaǵy apat: 19 turǵyn úı men 9 qora-qopsy órtendi

ARYS. QazAqparat - Arystaǵy apatty joıýmen 1 200-den astam adam aınalysyp jatyr. Bul týraly QR ІІM baspasóz qyzmetinen málim etti, dep habarlaıdy QazAqparat tilshisi.

«24 maýsym kúni saǵat 9.20-da Túrkistan oblystyq Tótenshe jaǵdaılar departamentine Arys qalasynda ornalasqan Qorǵanys mınıstrliginiń №44859 áskerı bóliminiń oq-dári qomasy órtenip jatqany týraly habarlama tústi. Oqıǵa ornyna órt sóndirý bólimsheleriniń kúshteri men quraldary dereý jiberildi. Halyqty evakýatsııalaý, sonymen qatar qoǵamdyq tártipti qorǵaý úshin ishki ister organdarynyń qyzmetkerleri men Ulttyq gvardııa áskerı qyzmetshileri jumyldyryldy. Barlyǵy 1 200-den astam adam», - dep atap ótedi mınıstrlikten.

Vedomstvo aqparatyna sáıkes, oqıǵa ornynda oblystyq jedel shtab qurylyp, ol Ordabasy aýdanyna qarasty Saryarqy eldi mekenine ornalastyryldy. Qaýyrt jeli qurylyp, 11 myńnan astam qońyraý kelip tústi.

«Qazirgi ýaqytta snarıadtardyń ushyp, jarylýyna baılanysty áskerı bólim qoımalaryndaǵy órtti sóndirý múmkin bolmaı otyr. Arys qalasynyń ózinde 23 órt sóndirýshiler toby jumys istep jtyr. Olar 19 turǵyn úı men 9 qora-qopsy órtin jáne 9 tabıǵı órtti sóndirdi. Evakýatsııalyq sharalar jalǵasyp jatyr. Tótenshe jaǵdaı aýmaǵynan 2815 adam shyǵaryldy. 39 myńnan astam adam óz betterimen shyǵyp ketti», - delingen taratylǵan aqparatta.

Qazirgi ýaqytta quqyqty tártipti qamtamasyz etý jáne turǵyndardyń múlkin qorǵaý sharalary júrgizilip jatyr. Qalany sholǵyndaýǵa 75 polıtsııa narıady jumyldyrylyp, 3 blok-post ornatylǵan. Qaladan shyqqan kólikter tekserilýde. Qylmystyq is qozǵaldy. Jedel tergeý toby jumys jasaýda.

Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Apat saldarynan eki adam mert boldy.

Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.

Búgingi Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletindigine ýáde berdi.

Jalpy keshegi alasapyran kezde myńdaǵan ata-ana balarynan kóz jazyp qalǵan bolatyn. Qazirgi ýaqytta olardyń barlyǵy da balalarymen qaýyshty, barlyǵy din-aman.