Arystaǵy 12,5 tonna oq-dári jańa saqtaý nysandaryna kóshiriledi

NUR-SULTAN. QazAqparat – QR Qarýly Kúshteri Bas shtaby bastyǵynyń birinshi orynbasary Rýslan Shpekbaevtyń aıtýynsha, búgingi kúni Arys qalasynda 12,5 tonna oq-dári saqtalǵan, dep habarlaıdy QazAqparat tilshisi.

«Qazirgi tańda Arys qalasynda 12,5 tonna oq-dári saqtaýda jatyr. Atalǵan oq-dáriler respýblıka aýmaǵynda 2 jańa saqtaý nysandarynyń qurylysy bitkennen keıin jedel túrde tasymaldanady», - dedi QR QK oq-dáriler Bas basqarmasynyń oq-dárilerdi esepke alý jáne qamtamasyz etý basqarmasynyń bastyǵy Nurálıhan Asanov OKQ-daǵy bapsasóz máslıhatynda.

Onyń aıtýynsha, jarý jumystary tek jumys kúnderi – dúısenbi men juma aralyǵynda kúnine saǵat 12.00-de jáne 16.00-de eki ret júrgiziletinin málim etti.

«Jarý jumystarynyń ótetini jaıly aldyn ala barlyq BAQ arqyly eskertilip, jumystary júrgizilýde», - dedi ol.

Al Arys qalasynyń ákimi Murat Qadyrbektiń aıtýynsha, josparly jarylystardy júrgizý aldynda áskerılerden habarlama kelip túsetinin aıtyp ótti.

«Biz habarlamany bir apta buryn BAQ arqyly taratamyz. Jarylystyń qaı ýaqytta jáne qaı orynda bolatynyn habarlaımyz. Habarlamany taratý kezinde búkil baılanys quraly ınternet te, televıdenıe de, tipti daýys údetkish quraldardy da paıdalanamyz. Arys turǵyndary bul jaǵdaıǵa túsinistikpen qarap otyr», - dedi ol.

Eske sala ketsek, buǵan deıin Asylbek Satybaldınov óńirden jarylý qaýpi bar 330 myń oq-dári áketilgenin málim etken edi.