Arysta jumyssyz otbasylarǵa 0,5 gektardan jer telimi beriledi

ARYS. QazAqparat – Arysta jumyssyz otbasylarǵa 0,5 gektardan jer telimi beriledi. Olar egin egip, tabys tabýlary tıis. Bul týraly Túrkistan oblysynyń ákimi Darhan Satybaldynyń Arys qalasy turǵyndarymen kezdesýinde málim etildi, dep habarlaıdy QazAqparat oblys ákiminiń baspasóz qyzmetine silteme jasap.

Qaladaǵy jumyssyz otbasylarǵa eginshilikpen aınalysýǵa jaǵdaı jasaý maqsatynda Arys qalasynda jalpy kólemi 50 gektar jer qorshalyp, 2 uńǵyma qazylyp, arnaıy sý jınaıtyn 60 tonnalyq qurylǵy qoıyldy.

Turmysy tómen ár otbasyǵa jarty gektar (0,5) jer telimi beriledi. Nátıjesinde bul otbasylar ózin-ózi jumyspen qamtıdy.

Joba óz tıimdiligin kórsetken jaǵdaıda, jer telimi 100 gektarǵa deıin ulǵaıtylady.

Kezdesýden soń oblys ákimi qabyldaýǵa jazylǵan turǵyndardyń saýaldaryna jaýap berip, barlyq máseleniń zań aıasynda sheshiletinin jetkizdi. Óńir basshysynyń halyqpen kezdesýi basqa aýdan, qalalarda jalǵasyn tabady.