Arysta jas aqyndar aıtysy ótti
ShYMKENT. Qazaqparat - Ońtústik Qazaqstan oblysynyń Arys qalasynda Qazaqstan Respýblıkasy Táýelsizdiginiń 25 jyldyǵyna oraı «Elimniń baqytyn terbetken - Táýelsizdik» taqyrybynda oblystyq deńgeıde jas aqyndar aıtysy ótti, dep habarlaıdy qala ákimdiginiń baspasóz qyzmeti. Aıtys óneri - qazaqtyń qanyna sińgen bekzat óner. Babalardan qalǵan osy ónerge eleńdemeıtin qazaq joq. Eńse tiktegen balasynan eńkeıgen qarııasyna deıin sýyryp salma aqyndardy tyńdaýdan jalyqqan emes. Topyraǵy kıeli Arys qalasynda jyl saıyn dástúrli túrde oblystyq jas aqyndar aıtysy ótkizilip keledi. Arys qalalyq ishki saıasat jáne «Jastar resýrstyq ortalyǵy» KMM-niń uıymdastyrýymen dástúrli aıtystyń shymyldyǵy ashyldy. Qalalyq mádenıet úıinde Qazaqstan Respýblıkasy Táýelsizdiginiń 25 jyldyǵyna oraı «Elimniń baqytyn terbetken - Táýelsizdik» taqyrybynda oblystyq deńgeıde jas aqyndar aıtysy ótti.
Qala ákimi Murat Qadyrbek aıtysty ashyp, jas aqyndarǵa sáttilik tiledi. Sondaı-aq, aıtysker aqyn Karıma Oralova jas aqyndarǵa arnaýyn aıtty. Taban astynda taýyp aıtyp, sóz óneriniń injý-marjanyn utymdy jetkize bilgen aqyndarǵa J.Baıgýttıeva atyndaǵy «Óner» mektebiniń dırektory J.Seıitbekov, Arys qalalyq tilderdi oqytý ortalyǵynyń qazaq tili jáne ádebıeti pániniń muǵalimi Z.Dosymbekova, aqyn- ustaz R.Sultanálıeva qazylyq etti.
Dúbirli aıtysta aqyndaramyz Táýelsizdiktiń 25 jyldyǵy aıasynda jyrdan shashý-shashyp, bir-birine ótkir suraqtar qoıyp, utymdy jaýaptar qaıtaryp, aıtys súıer qaýymnyń kóńilinen shyǵyp, kórermenderdi jelpindirip otyrdy.
Nátıjesinde, «Bas júldeni» Saıram aýdanynyń azýly aqyny J.Myrzabekov qanjyǵasyna baılasa, І- oryndy Sozaq aýdanynan A.Nııazbek enshiledi. ІІ-oryndy otyrarlyq aqyn M.Jaqyp alsa, ІІІ-oryn Tólebı aýdanynyń aqyny B.Rahmatýllaevqa buıyrdy.
Arys qalasy ákiminiń arnaıy syılyǵyn shymkenttik aqyn J.Balqash jeńip aldy. Al túrkistandyq Y.Dosjanova «Úzdik jas aqyn» nomınatsııasymen marapattaldy. Aıtysqa qatysqan jas aqyndardyń barlyǵy Arys qalasynyń ákimi M.Qadyrbektiń «Alǵys hatymen» marapattalyp, túrli baǵaly syılyqtarǵa ıe boldy.
