Arysta jarylystan soń jaramsyz kúıde qalǵan 480 úı salynyp, el ıgiligine berildi
«Arysta jalpy 8626 úı bar. Jarylys saldarynan 7635 úı zardap shekken bolatyn. Onyń ishinde 480 jaramsyz dep tanylyp, qaıtadan salynyp, paıdalanýǵa berildi. Jóndeýdi qajet etetin 7255 úıge jóndeý jumystary júrgizilip, halyq ıgiligine berildi», - dedi OKQ-daǵy baspasóz máslıhatyna onlaın rejımde qatysqan Arys qalasynyń ákimi Murat Qadyrbek.
Onyń aıtýynsha, metsenat Bolat Ótemuratovtyń qory qala turǵyndaryna qospáterli 50 úıdiń qurylysyn salyp, 100 otbasy baspanamen qamtamasyz etilgen.
«Tótenshe jaǵdaıdan zardap shekken Arys qalasy men Aqdala, Dermene, Qojatoǵaı aýyldyq okrýgterine qarasty 8 eldimekende turatyn 62 610 azamatqa 6 mlrd 661 mln teńge ótemaqy tólendi. Arys qalasy boıynsha tótenshe jaǵdaıdan zardap shekken kásipkerlik nysandardyń sany — 467. Onyń ishinde 404 nysannyń ıesine «Meniń Atamekenim» qoǵamdyq qory arqyly 3 mlrd 69 mln teńge kóleminde kásipkerlik nysandaryn qalpyna keltirý úshin ótemaqy tólendi. 63 kásipkerlik nysan ıesine qorda qarajattyń jetispeýine baılanysty tólemdi aldaǵy ýaqytta berýdi josparlap otyrmyz», - dedi ol.
Sonymen qatar, Arysta jalpy 66 áleýmettik nysan zardap shekti. Sonyń ishinde balabaqsha, mektep pen sport kesheni bar. Jarylystan keıin 4 nysan jańadan salynǵan.
Eske sala ketsek, buǵan deıin Asylbek Satybaldınov óńirden jarylý qaýpi bar 330 myń oq-dári áketilgenin málim etken edi.
