Arysta jańa emhana men aýrýhana salynady

NUR-SULTAN. QazAqparat - QR Densaýlyq saqtaý mınıstri Eljan Birtanov ortalyq kommýnıkatsılar qyzmetinde Arys qalasyndaǵy medıtsınalyq nysandardyń jaǵdaıy týraly aqparat berdi, dep habarlaıdy QazAqparat tilshisi.

Mınıstr Arys qalasyndaǵy medıtsınalyq nysandardyń ahýalyna toqtaldy.

«Qalalyq emhana men aýrýhana da jarylys kezinde búlingen bolatyn. Usaq-túıek jóndeý jumystarynan keıin emhana qaıta qoldanysqa berildi. Qazir jumys istep tur. Apat kezinde naýqastardy Ordabasy aýdandyq aýrýhanasy men Túrkistandaǵy oblystyq aýrýhana qabyldaǵan bolatyn. Qazir halyqqa em-dom jasaý úshin qalanyń 17 shtabynda jyljymaly medıtsına jasaǵy, 5 jyljymaly keshen jumys istep tur», - dedi Eljan Birtanov.

Onyń aıtýynsha, Úkimet basshysy Asqar Mamın Arysqa jasaǵan saparynda qaladaǵy eki medıtsınalyq nysannyń jaǵdaıymen arnaıy baryp tanysqan.

«Emhananyń da, aýrýhananyń da tozyǵy jetkenin Asqar Uzaqbaıuly óz kózimen kórip, ornyna jańa ǵımarattar salýdy tapsyrdy. Qazirdiń ózinde qajetti jobalyq-smetalyq qujattamalardy daıyndap jatyrmyz. Tek jańa ǵımarat salynyp qana qoımaıdy. Qos nysan da barlyq zamanaýı qondyrǵylarmen jabdyqtalady», - dedi mınıstr.

Aıta ketsek, Nur Otan partııasy tóraǵasynyń birinshi orynbasary Baýyrjan Baıbek Arys qalasyna issaparmen baryp, turǵyndarmen kezdesken bolatyn.