Arysta Táýelsizdik merekesine oraı 16 nysan el ıgiligine berildi
TÚRKІSTAN. QazAqparat - Arysta Táýelsizdik merekesi qarsańynda 108 otbasy baspanaly boldy. «Kóktem-2» móltek aýdanynyń mańynda jańa sport alańshasy el ıgiligine berildi, dep habarlaıdy QazAqparat tilshisi.
Túrkistan oblysy ákiminiń baspasóz qyzmeti BAQ ókilderi úshin Arys qalasyna press-týr uıymdastyrdy. Onda jýrnalıster Táýelsizdik merekesi qarsańynda jańadan paıdalanýǵa berilgen kópqabatty turǵyn úı jáne birqatar áleýmettik nysandardyń ashylý rásimine qatysty.
Bul kúni «Kóktem-2» móltek aýdanynda 36 páterlik úsh birdeı kópqabatty úı baspana kezeginde turǵan azamattarǵa berildi. Saltanatty sharada oblys ákiminiń orynbasary Tólegen Sársembaev turǵyndardy merekemen quttyqtap, 108 páterdiń kiltin qýanysh ıelerine tabystady. Úsh qabattan turatyn nysandardyń jalpy smetalyq quny 841 mlrd 781 mln teńgeni quraǵan.
Qurylys jumystary 2017 jyly bastalyp, bıyl aıaqtalyp otyr. Al, jańadan paıdalanýǵa berilgen sport alańshasynyń smetalyq quny 60 mln teńgeni quraǵan. Balalarǵa arnalǵan alańshanyń qurylys jumystaryn «Samuryq - Qazyna Trans» AQ-nyń tapsyrysymen merdiger «Master - Qazstroı» JShS júrgizgen.
Odan bólek, jýrnalıster abattandyrý jumystarynan ótken qos birdeı saıabaqty aralap kórdi. Ál-Farabı kóshesi boıynda ornalasqan «Qurmetti azamattar» saıabaǵyn abattandyrý jumystary ótken jyly bastalyp, bıyl aıaqtalyp otyr. Onda aǵashtar otyrǵyzylyp, oryndyqtar men jaryqshamdar qoıylǵan. Osy kósheniń boıyndaǵy abattandyrý jumystary júrgizilgen «Máńgilik el» saıabaǵy da eldiń qýanyshyna aınalyp otyr.
Aıta keteıik, Arys qalasynda merekege oraı 16 nysan el ıgiligine berildi. Atap aıtqanda, úsh bilim, eki saıabaq, úsh turǵyn úı, bir sport alańshasy, eki birdeı kópir, jáne eki nysan elektr energııasymen jabdyqtalyp, birneshe aýmaqtarǵa abattandyrý jumystary júrgizildi.
