Arysta «Táýelsiz elim - uly ólkem» atty saltanatty shara ótti
ShYMKENT. QazAqparat - Ońtústik Qazaqstan oblysynyń Arys qalasynda «Táýelsiz elim - uly ólkem» taqyrybynda saltanatty merekelik is-shara ótti, dep habarlaıdy qala ákimdiginiń baspasóz qyzmeti.
Qazaqstan Táýelsizdiginiń jıyrma bes jyly ishinde álem moıyndaǵan memleketterdiń qataryna qosyldy. Ǵasyrlar boıy babalar armandaǵan táýelsizdiktiń týy kókte jelbirep, Elbasy Nursultan Nazarbaevtyń salıqaly saıasatynyń arqasynda Táýelsiz qazaq eli qalyptasyp, tarıhymyz túgeldenip, tilimiz, dinimiz jáne dilimiz qaıta oralyp, memleketimizdiń ulttyq rámizderi qabyldandy.
Osy maqsatta, búgin Qazaqstan Respýblıkasy Táýelsizdiginiń 25 jyldyǵyna arnalǵan «Uly dala eli - Táýelsizdiktiń 25 negizi» atty 25 juldyzdy kún aktsııasy aıasynda Arys qalasyndaǵy №17 Kásiptik kolledj stýdentteriniń uıymdastyrýymen «Táýelsiz elim - uly ólkem» taqyrybynda saltanatty merekelik is-shara ótti. Sharanyń maqsaty - bolashaq urpaqtyń rýhanı tulǵalyq jáne adamgershilik qundylyqtaryn damytý. Otanyn súıýge, el tarıhyn bilýge, elimizdiń memlekettik rámizderin qasterleýge, otanymyzdyń baılyǵyn qorǵaýǵa, elimizdi órkendetýge bilimdi urpaq bolýǵa tárbıeleý bolyp tabylady. Atalǵan saltanatty keshte kolledj stýdentteriniń qoldarynan shyqqan turmysqa qajetti buıymdarynan kórme uıymdastyrylyp, jınalǵan kópshilikke qoljetimdi baǵada satyldy.
Saltanatty jıynda Arys qalasynyń áleýmettik-ekonomıkalyq órkendep damýyna jáne qoǵamdyq ómirine belsene qatysqan kolledj qyzmetkerlerin marapattaý rásimi ótti. Merekelik is-shara barysynda kolledjdiń ónerge beıim stýdentteri jurtshylyqqa Táýelsizdik taqyryptarynda teatrlandyrylǵan kórinister qoıyp, kontserttik baǵdarlama usyndy.
