Arysta óner juldyzdarynyń qatysýymen kontsert ótti

ARYS.QazAqparat - Arys qalasyndaǵy ortalyq «Ál-Farabı» alańynda elimizdegi óner juldyzdarynyń qatysýymen «Jasa, jaına Alashymnyń Arysy» atty kontserti ótti, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Halyqqa mádenı-rýhanı serpilis syılap, merekelik kóńil kúıdi tartý etý maqsatynda uıymdastyrylǵan sharaǵa Dos-Muqasan ansambliniń ánshisi, Qazaqstannyń eńbek sińirgen ártisi, Arys qalasynyń Qurmetti azamaty Aqjol Meıirbekov, QR Memlekettik syılyǵynyń laýreaty, Arys qalasynyń týmasy Nurjamal Úsenbaeva, kompozıtor-ánshi Nurlan Espanov, Janbolat pen Jazıra, Lázzát Baıyrbekova, Beıbarys Serikbaev, Maqsat Aıtjanov, Álden Jaqsybekov, Farhat Eskeneev syndy Arystan shyqqan sahna sańlaqtary men «Farab» bı ansambli qatysty. Sondaı-aq, aıtysker aqyn Kárıma Oralova Arys halqyna arnaýyn aıtyp, eldiń yqylasyna bólendi. Shara aıasynda Arys qalasynyń ákimi Murat Qadyrbek qıyn-qystaý sátte qoldaý berip, kómek qolyn sozǵan barsha qazaqstandyqtarǵa alǵysyn bildirdi. Týǵan jerge kelip, perzenttik paryzyn kórsetken óner maıtalmandaryna oblys ákimi Ómirzaq Shókeevtiń arnaıy alǵys haty men syı-sııapattary tabystaldy. Kontsertti Túrkistan oblysy ákimdigi men Mádenıet basqarmasy jáne oblystyq «Túrkistan saraıy» kontserttik uıymy uıymdastyrdy.