Arysta oq-dárilerdi joıýǵa robottandyrylǵan keshen qoldanylady

NUR-SULTAN. QazAqparat - Qorǵanys mınıstri Nurlan Ermekbaev Arys qalasynda oq-dári qoımalaryndaǵy órt saldaryn joıý jumysyn tekserdi, sondaı-aq Qazaqstannyń ońtústiginde ornalasqan áskerı bólimder men mekemelerge baryp qaıtty, dep habarlaıdy QazAqparat vedomstvonyń baspasóz qyzmetine silteme jasap.

Mınıstr Nurlan Ermekbaev Arys qalasyndaǵy ınjenerlik-saperlik qurama jasaqtyń qyzmetine zer saldy. Oǵan oq-dáriler qaldyqtaryn jınaý men olardy kádege jaratý boıynsha júrgizilip jatqan jumystar týraly baıandady.

Jumysqa zamanaýı ınjenerlik tehnıka jumyldyrylady. Atap aıtqanda, operator qorǵalǵan pýnktten basqarylatyn «tEODor» robottandyrylǵan kesheni qoldanylady. Robottyń salmaǵy 100 kg deıingi zattardy 2 shaqyrym qashyqqa tasymaldaýǵa qabiletti.

Zamanaýı yńǵaıly jáne jeńil basqarylatyn ekskavator mashınalary qoldanylady.

«Oq-dárilerdi jınaý men kádege jaratý ádistemesi únemi jetildirilip otyrady. Búgingi tańda oq-dárilerdi jınaý arnaıy konteınerlerde júzege asyrylady, onda olar belgilengen jerge jetkizilip, joıylady. Bul saperlerdiń oq-dárilermen tikeleı baılanysyn azaıtýǵa jáne tótenshe jaǵdaılardyń paıda bolý múmkindigin azaıtýǵa múmkindik beredi.

Saperlermen jumys barysynda beınebaqylaý quraldarymen jáne dozımetr aspabymen jaraqtalǵan otandyq óndiristiń «Saqtaý» jınaqqa qarsy qorǵanysh kostıýmderi paıdalanylady», delingen habarlamada.

Qalada jáne onyń aınalasynda oq-dári qaldyǵy áli izdelip jatyr. Kóptegen jaǵdaı tabylǵan zattar jergilikti turǵyndarǵa qaýip tóndirmeıtini atap ótildi.

Áskerı saperler qalaǵa irgeles aýmaqtarda egis naýqanyn qaýipsiz júrgizý men mal jaıýdy qamtamasyz etti. Jergilikti turǵyndar da áskerı qyzmetshilerdiń jumysyna túsinistikpen jáne qoldaýmen qaraıtyny atap ótildi.

«Sonymen qatar, belgisiz zattardy tapqan kezde áskerı qyzmettiń kúndelikti tynys-tirshiligi men azamattardyń is-qımyl tártibi týraly turǵyndardy habardar etý boıynsha sharalar júzege asyrylýda. Osy maqsatta jergilikti atqarýshy organdar men utqyr mınasyzdandyrý toptarynyń ózara tyǵyz is-qımyly uıymdastyrylǵan», delingen habarlamada.

Qorǵanys mınıstri birqatar tapsyrma berdi. Olardyń kóbi órt saldaryn joıýǵa qatysatyn jergilikti turǵyndar men áskerı qyzmetshilerdiń qaýipsizdigin qamtamasyz etý jóninde boldy.

Túrkistan oblysynda ornalasqan áskerı bólimderde qorǵanys vedomstvosynyń basshysy qarý-jaraq pen oq-dárilerdiń saqtalý jaı-kúıin, áskerı obektilerdiń órtke qarsy jáne dıversııaǵa qarsy qaýipsizdik jaǵdaıyn tekserdi.

Qorǵanys mınıstri sondaı-aq, Ońtústik Qazaqstan memlekettik ýnıversıtetinde baryp, áskerı kafedradaǵy oqý úrdisiniń jaı-kúıimen tanysty.