Arysta qutqarýshylar kúnine oraı sala mamandaryna qurmet kórsetildi
ShYMKENT. QazAqparat - 19 qazan - qutqarýshylar kúni. Osyǵan oraı búgin Arys qalasy ákimdiginiń úlken májilis zalynda Qazaqstan Respýblıkasy Qutqarýshylar kúni saltanatty túrde atalyp ótildi, dep habarlaıdy qala ákimdiginiń baspasóz qyzmeti.
Bul meıram Qazaqstan Respýblıkasy Prezıdentiniń 1995 jylǵy 19-qazandaǵy Qazaqstan Respýblıkasynyń Tótenshe jaǵdaılar jónindegi memlekettik komıtetin qurý týraly № 2541 Jarlyǵyna sáıkes, Tótenshe jaǵdaılar qyzmetiniń qurylǵan kúni bolyp esepteledi. Qazaqstan Respýblıkasynyń memlekettik organdary qurylymynyń qýatty kúshi, kúndelikti, mınýt saıynǵy apatty joıýǵa daıyndyq ǵana emes, onyń aldyn-alý, tabıǵı jáne tehnogendik apattardy boldyrmaý bolyp tabylady.
Qutqarýshylardyń jumysy óz ómirine qaýipti bolyp keledi. Degenmen, olardyń alǵa qoıǵan basty mindeti- halyqtyń tynysh ómirin, turmystaǵy, óndiristegi qaýipsizdigin qamtamasyz etip, apattyq jaǵdaıǵa jol bermeý bolyp tabylady.
Osy maqsatta búgin qala ákimdiginiń úlken májilis zalynda Qazaqstan Respýblıkasy Qutqarýshylar kúni saltanatty túrde atalyp ótti.
Ánuranymyz asqaqtaǵan tusta qoldaryn júrekterine qoıyp, tebirenip turǵan bul qyzmetkerlerdiń eńbegi eren. Óıtkeni, olar adam ómiri qyl ústinde turǵan syn saǵatta qol ushyn sozyp, ár túrli jaǵdaılarǵa dýshar bolǵandardy qutqaryp, ajal aýzynan arashalaıdy. Adam qutqarýdy erlik emes, azamattyq paryzym dep biletin olarǵa búgin barynsha syı qurmet kórsetildi.
Eńbegimen erekshe kózge túsken, qyzmettik mindetterin adal atqarǵan, qyzmette joǵary nátıjelerge qol jetkizgen úzdik qyzmetkerler qala ákiminiń, qalalyq máslıhat hatshysynyń, Arys aýdanynyń tótenshe jaǵdaılar bólimi bastyǵynyń Alǵys hattarymen marapattaldy.
Jıyn sońy mádenıet úıi qyzmetkerleri uıymdastyrǵan kontserttik baǵdarlamaǵa ulasty.
