Arysta qoǵamdyq tártipti saqtaýǵa erekshe úles qosqan polıtseıler marapattaldy
Arys qalasynyń turǵyndaryn qaýipsiz aımaqqa kóshirip, qoǵamdyq tártipti qamtamasyz etken jáne azamattardyń múlikterin saqtaýda ózine berilgen tapsyrmany joǵary deńgeıde uıymdastyra bilgen tártip saqshylaryna qurmet kórsetildi, dep habarlaıdy QazAqparat tilshisi.
El basyna kún týǵan sátte óziniń qyzmettik mindetterin adal, ári asqan tabandylyqpen oryndaǵan tártip saqshylaryn Túrkistan oblystyq Polıtsııa departamentiniń bastyǵy, polıtsııa general-maıory Qaırat Dálbekov saltanatty túrde marapattady. Antyna adal bolyp, eńbegi elengen qyzmetkerlerge syı-sııapat jasady.
«Árqashanda, osyndaı batyl da batyr bolyńyzdar. Sizder halyqtyń qaýipsizdigin, qoǵamnyń tynyshtyǵyn saqtaýda aıanbadyńyzdar, mindetterińizdi minsiz atqardyńyzdar. Eń bastysy maqtaýǵa laıyqty jumys jasadyńyzdar. Men óz atymnan alǵys bildire otyryp, jumystaryńyzǵa sáttilik, otbasylaryńyzǵa amandyq tileımin»,-dedi Qaırat Dálbekov.
Eńbegi elengen polıtseılerdiń qatarynan departament bastyǵynyń orynbasary, polıtsııa polkovnıgi Abdiǵanı Seıdýalıev te tabylyp, oǵan II dárejeli «Aıbyn» ordeni tapsyryldy. Sondaı-aq, Prezıdenttiń marapatyna Arys APB bastyǵy, polıtsııa polkovnıgi Nurlan Isabekov, osy aýdannyń polıtsııa bóliminiń polıtsııa kapıtany Nurmahanbet Erkebaev, polıtsııa kapıtany Mars Asanbaev, polıtsııa kapıtany, Nursultan Nabıalıev, polıtsııa maıory Tólegen Rysbekov, polıtsııa aǵa leıtenanty Dáýlet Tóretaıuly, polıtsııa aǵa serjanty Jaqsylyq Táttibekovter laıyqty dep tanyldy. Olarǵa «Erligi úshin» medali tabystaldy.
