Arysta Qazaqstan máslıhattarynyń 25 jyldyǵy atalyp ótti

ARYS.QazAqparat – Túrkistan oblysynyń Arys qalasynda qalalyq máslıhattyń qurylǵanyna 25 jyl tolýyna oraı «Jıyrma bes jyldyń jylnamasy» taqyrybynda forým ótti, dep habarlaıdy QazAqparat tilshisi.

Basqosýǵa jergilikti máslıhattardyń depýtattary men burynǵy halyq qalaýlylary, mekeme jáne bólim qyzmetkerleri qatysty. Forýmda temirjolshylar qalasynyń ótkeni men búgininen syr shertetin kórme uıymdastyrylyp, jınalǵan qaýym beınerolıkter tamashalady. Qala ákimi Murat Qadyrbek aıtýly kúnmen jurtshylyqty quttyqtap, máslıhat depýtattary atqarǵan aýqymdy jumystardyń mańyzdylyǵyna toqtalyp ótti. «El táýelsizdigin alǵan tusta Qazaqstanda demokratııalyq qundylyqtar qalyptasyp, saltanat qura bastady. Sonyń bir kórinisi jergilikti ókiletti organ - maslıhattardyń qurylýy. Bıyl halyqtyń senimi men qurmetine ıe bolǵan organnyń aıtýly datasy – 25 jyldyǵy atalyp ótilýde. Ókiletti organ 25 jylda áleýmettik ortamen qoıan-qoltyq aralasyp, halyqtyń talap-tilek, usynystaryn tyńdap, atqarýshy bılik pen áleýmettik ortanyń arasyndaǵy aqyldasý alańyna aınaldy», - dedi qala ákimi. Jıynda sondaı-aq, Arys qalalyq máslıhatynyń hatshysy Amantaı Baıtanaev baıandama jasady. Birqatar depýtattar men azamattar quttyqtaýlaryn jetkizdi. Qazaqstan Respýblıkasyndaǵy jergilikti memlekettik basqarý jáne ózin-ózi basqarýdyń damýy men qalyptasýyna, qalanyń qoǵamdyq ómirine belsene qatysyp júrgen depýtattar men eńbegi sińgen azamattar «Qazaqstan máslıhattaryna 25 jyl» merekelik medaldarymen marapattaldy. Shara sońy aýdan ónerpazdarynyń kontserttik baǵdarlamasyna ulasty.