Arysta qaza tapqan áskerı qyzmetshiler «Aıbyn» ordenderimen marapattaldy

ARYS. QazAqparat – Arystaǵy jarylys kezinde qaza tapqan áskerı qyzmetshiler memlekettik nagradalarmen marapattaldy. QR Qorǵanys mınıstri Nurlan Ermekbaev marqumdardyń otbasylaryna «Aıbyn» ordenderin tabystady, dep habarlaıdy QazAqparat tilshisi.

Arystaǵy áskerı bólimde ótken marqumdardy eske alý jıynyna Qorǵanys mınıstrligi basshylyǵy men jergilikti bılik ókilderi jáne áskerıler qatysty. Jıynǵa kelgender qaza tapqan áskerı qyzmetshilerdi bir mınýt únsizdikpen eske aldy. Jaýyngerlik joldastaryn eske alý úshin Arys áskerı bólimderiniń jeke quramy saltanatty sherýmen júrip ótti. Al, elimizdiń Qorǵanys mınıstri Nurlan Ermekbaev qos birdeı áskerı qyzmetshiniń Otan aldyndaǵy boryshyn atqarý kezinde kórsetken erligi men janqııarlyǵyna erekshe toqtaldy. Aǵa serjant Baýyrjan Álimbekov pen serjant Ábdiqul Ahmetov QR Prezıdenti – Qarýly kúshteriniń Bas qolbasshysynyń Jarlyǵymen ІІ dárejeli «Aıbyn» ordenderimen marapattalǵanyn jetkizdi.

«Jarylys kezinde aǵa serjant Baýyrjan Álimbekov pen serjant Ábdiqul Ahmetov kózsiz erlik tanytyp, qyzmet ornynda aqtyq demi qalǵansha órtke qarsy kúresti. Óz áskerı boryshyn oryndaý kezinde qaza tapty. Jarylys qaterine qaramastan órt saldaryn joıý kezinde qaısarlyq tanytqan áskerı qyzmetshilerimizdi erekshe atap ótkim keledi. Olar tanytqan erjúrektik pen batyldyqtyń arqasynda basqa adam shyǵyndary bolmady. Áskerı bólimdegi qyzmetkerler basqa da qyzmetshiler qaýipke qaramastan oqıǵanyń alǵashqy sátinen bastap osy kúnge deıin qarý jaraq saqtalǵan qoımalarda jumys istep jatyr. Olardyń jedel ári batyl áreketiniń arqasynda kóptegen azamattyq adamdardyń ómiri saqtalyp qaldy. Marqumdardyń beınesi jadymyzda máńgi saqtalady. Óskeleń urpaq úshin úlgi ónege bolyp tabylady»,- dedi Nurlan Ermekbaev.

Sóz sońynda mınıstr «Aıbyn» ordenderin marqumdardyń analary men jubaılaryna tabys etti. Sondaı-aq, qazirgi kezde áskerı bólimshedegi qoımalarda jarylǵysh zattar men qarý-jaraqtardy kóshiýge atsalysyp jatqan qyzmetshilerge alǵys bildirdi.

«Mobıldi jáne ınjenerlik-saperlik toptar, jóndeý jáne qalpyna keltirý batalony jeke quramyn, medıtsına personalynyń , áskerı qyzmetshileri men veterınarıa qyzmetkerleriniń eren eńbegin atap ótkim keledi. Olar qazirgi ýaqytta tótenshe jaǵdaı saldaryn joıýdy, qoımalardy kóshirýdi, metall synyǵyn jınaý men suryptaýdy, Arystyń turǵyn úı jáne ákimshilik aýmaǵyn qalpyna keltirý jáne jóndeý jumystaryn jalǵastyrýda. Elimizdiń naǵyz partıot uldaryn tárbıelegen ata–analarǵa erekshe alǵys bildiremin»,- dedi Nurlan Ermekbaev.