Arysta qaı aýdan jumysty uıymdastyra almasa, jaýapty adamdy jumystan bosatamyn - Shókeev

ARYS. QazAqparat - Búgin Túrkistan oblysynyń ákimi Ómirzaq Shókeev aptalyq apparattyq májilisti Arys qalasynyń ákimdiginde ótkizdi. Jıynǵa óńirdegi qurylym basshylarynan bólek, respýblıkanyń barlyq oblystarynyń ókilderi qatysty, dep habarlaıdy QazAqparat tilshisi.

Kún tártibinde Arys qalasyn qalpyna keltirý máselesi qaralyp, atqarylatyn jumystar pysyqtaldy. Májiliste aımaq basshysy aýdan-qala basshylaryna tapsyrylǵan jumysqa jaýapkershilikpen qaraý kerektigin eskertti. Sondaı-aq, basqa oblystyń ókilderine de nysandardy jóndeýdi merziminen keshiktirmeı atqarý kerektigin pysyqtady.

«Men osynda bir aı bolyp, qurylysty kúnde basynda turyp qadaǵalaımyn. Eger qaı aýdan nemese qala jumysty durys uıymdastyra almasa, jaýapty adamdy jumystan bosatamyn. Al, jaýapty oblystar salǵyrttyq tanytsa, Úkimet basshysyna málimdeımin. Halyqtyń muqtajyn jedel sheshýimiz kerek»,- dedi Ómirzaq Shókeev.