Arysta qatty jarylys bolady dep aqparat taratqan kelinshekke qylmystyq is qozǵaldy

ARYS. QazAqparat - Arysta qatty jarylys bolady dep jalǵan aqparat taratqan kelinshek jurttan keshirim surady. Ol whatsApp áleýmettik jelisindegi «Arys qalasy» tobyna qaladan «Lýna» atty bomba shyǵarylatynyn aıtyp, jurtty dúrliktirgen bolatyn, dep habarlaıdy QazAqparat tilshisi.

Ol óz habarlamasynda «Qurmetti Arystyqtar 12-15 shildege deıin Arystan ketýlerińizdi suraımyz. V/ch taǵy «Lýnalardy» (bomba) shyǵarmaqshy. Ol kezde qaýip tónýi múmkin bolǵandyqtan turǵyndardy qaladan shyǵarmaqshy» dep jazǵan. Osydan keıin jergilikti polıtsııa qyzmetkerleri jalǵan málimet taratqan áıeldi anyqtap, ony jergilikti polıtsııa bólimine jetkizgen. Onyń kópshilik aldynda keshirim suraǵany beınetúsirilimge jazylyp, taratyldy.

Beınetúsirilimde ol «Men Arys turǵyny Japqsylyqova Roza Ospanhanovna 12-15 shilde aralyǵynda «Lýna» bombasy shyǵarylady dep whatsApp jelisi arqyly «Arys qala» grýppasyna kartınka arqyly jibergenim ras. Sabyr saqtańyzdar. Jalǵan aqparat jibergenim úshin keshirim suraımyn» deıdi.

Oblystyq PD baspasóz qyzmetiniń jetekshisi Saltanat Qarakózovanyń aıtýynsha, ustalǵan kelinshektiń esh jerde jumys istemeıtini jáne psıhonevrologııalyq dıspanserde esepte turmaıtyny anyqtalǵan.

«Osy jaıt Arys APB-niń SDTBT-ne tirkeýge alyndy. Kúdikti azamatsha anyqtalyp, onyń jergilikti turǵyn ekeni belgili boldy. Oǵan qatysty QR QK-niń 274-baby «Kórineý jalǵan aqparat taratý» boıynsha sotqa deıingi tergeý amaldary júrgizilip jatyr. Tergeý barysynda onyń ne sebepti jalǵan málimet aıtqany jáne tolyq mán-jaıy anyqtalatyn bolady»,- deıdi Saltanat Qarakózova.