Arysta karantınge qaramastan qudalyq ótkizgen meıramhana áshkere boldy
Túrkistan oblysynda ınfektsııalyq aýrýlardy juqtyrǵan naýqastar sany azaımaı tur. Sondyqtan óńirde karantın rejımi jaǵdaı turaqtanǵansha jalǵasady. Túrkistan oblysy bas sanıtar dárigeriniń sheshimine sáıkes, shekteý sharalary qaıta kúsheıtilgen.
Osyǵan oraı Túrkistan oblysy polıtsııa departamentine qarasty barlyq polıtsııa bólim, basqarma qyzmetkerleri adam kóp shoǵyrlanatyn qoǵamdyq oryndar, bazar, kafelerde túsindirme jumysyn júrgizýde. Arnaıy kólikpen kóshe-kósheni aralap, qaýipsizdik sharalarynyń, araqashyqtyqtyń saqtalýyn eskertip júr.
Alaıda, aıtylǵan eskertýlerge qaramastan, talapqa baǵynbaıtyn uıymdar da joq emes.
Senbi, jeksenbi kúnderi jumys isteýge tyıym salynǵan nysandardy baqylap, reıd júrgizý kezinde jergilikti polıtsııa qyzmetiniń ınspektorlary Arys qalasy kósheleriniń birinde ornalasqan meıramhananyń jumys istep, ishinde adamdar toptasyp, qudalyq ótkizip jatqanyn anyqtady.
Osy zańsyzdyq boıynsha qajetti materıaldar jınaqtalyp, sanıtarııalyq-epıdemıologııalyq qyzmet organdaryna jiberildi.
Budan keıingi kúnderi de polıtseıler kásipkerlerge karantınge baılanysty shekteýlerdi eskerýin qadaǵalap, reıdti úzdiksiz uıymdastyryp otyrady.