Arysta qaraqshylar eki ınkassatordy óltirip, 7,5 mln teńgeni alyp ketken
ARYS. QazAqparat - Túrkistan oblysynyń polıtseıleri ınkassatorlardy óltirip, aqshasyn alyp ketken kúdiktilerdi izdestirip jatyr, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
«7 maýsymda keshki saǵat 18:15 shamasynda Arys APB kezekshi bólimshesine poshta bóliminen Arys aýdanyna qarasty aýyldardyń birine qarjy jetkizý úshin shyǵyp ketip, habarsyz ketken eki ınkassator týraly habarlama kelip túsedi. Qyzmettik kóliktiń ishinde zeınetaqy men járdemaqy tóleýge arnalǵan 7,5 mıllıon teńgeden astam qarjy bolǵan. Oqıǵa ornyna birden Arys APB jedel-tergeý toby jetedi. Anyqtalǵandaı, ınkassatorlar belgilengen baǵyt boıynsha aýyldardyń birine ketip, baılanysqa shyqpaı qalǵan. Polıtseıler aýdannan shyǵar jerlerdi, aımaqtardy, kósheler men qıylystarǵa qoıylǵan beınekameralardy tekserip, kýágerlerden suraq-jaýap alyp, qajetti sharalardy atqaryp jatyr» delingen habarlamada.
Inkassatorlardy izdeýge Túrkistan oblysy polıtsııa departamentiniń Krımınaldy polıtsııa basqarmasynyń qyzmetkerleri men Arys APB polıtseıleri jumyldyryldy. Nátıjesinde jedel ýákilder Arys qalasynan 5 shaqyrym jerden ıesiz kólikti, al aýdan ortalyǵynan 35 shaqyrym jerden oq jaraqatymen ınkassatorlardyń máıitin tapty.
Qazirgi tańda atalǵan jaıt boıynsha QR Qylmystyq kodeksiniń eki babymen, ıaǵnı 99-baby «Adam óltirý» jáne 192-baby «Qaraqshylyq» boıynsha is qozǵaldy. Polıtseıler aýyr qylmysty jasaǵan kúdiktilerdiń tulǵasyn anyqtaý jáne olardy quryqtaýǵa baǵyttalǵan keshendi jedel-izdestirý sharalaryn júrgizip jatyr.
