Arysta ıesiz qalǵan 200-ge jýyq bas mal kúzetke alyndy

ARYS. QazAqparat - Arystaǵy áskerı bólimde bolǵan jarylystan soń qalany kúzetip júrgen patrýldik polıtsııa ıesiz júrgen 37 qoı men 150 bas iri qara maldy kúzetke aldy, dep habarlaıdy QazAqparat tilshisi.

Túrkistan oblysynyń ákimdiginen habarlaǵandaı, Arys aımaǵyna Túrkistan oblystyq Polıtsııa departamentiniń 448 qyzmetkeri, áskerı polıtsııanyń 10 qyzmetkeri, №0358 áskerı bóliminiń 200 áskerı qyzmetshisi, 75 arnaıy avtokólik jumyldyrylǵan.

Sonymen qatar Ulttyq ulannyń №6506 áskerı bóliminiń 580 áskerı qyzmetshisi, 36 avtokóligi tartylǵan.

Halyqty qaýipsiz jerge kóshirý úshin jol talǵamaıtyn 10 «Ýral» kóligi attandyryldy.

QR Qorǵanys mınıstrligine qarasty 1800 áskerı qyzmetshi jumys isteýde.

Aıta keteıik, keshe Ulttyq ulan sarbazdary 3 uryny ustasa, búgin polıtsııa qyzmetkerleri 4 urlyq deregin áshkereledi.

Arys aýmaǵyna kirýdiń aldyn alý maqsatynda qalany aınala 20 beket qoıylǵan.

Polıtsııa departamentiniń qyzmetkerleri QR Qorǵanys mınıstrliginiń qyzmetshilerimen birige otyryp Arystaǵy qaýip aımaǵynan snarıadtardy mınasyzdandyrý jumystaryn júrgizdi. Nátıjesinde 130 snarıad zararsyzdandyryldy.