Arysta eshqandaı epıdemıologııalyq qaýip joq - mamandar
Ákimdik qalada bolǵan apattan keıin shyǵyp jatqan mundaı dálelsiz aqparlarǵa ermeýge shaqyrady.
Búgin Túrkistan oblystyq klınıkalyq aýrýhanasynyń bas dárigeri Marat Pashımov Arys qalasy ákimdiginde ótken brıfıngte áleýmettik jeliler men dálelsiz jalǵan aqparat tarqatqan keıbir BAQ-taǵy málimetterdiń shyndyqqa janaspaıtynyn málim etti.
Túrkistan oblysynyń dárigerleri Arys qalasy turǵyndarynyń densaýlyǵyn tekserý úshin aýla aralaý jumystaryn júrgizýde. Halyq arasynda kenetten kelgen keselge kezikkeni anyqtalmaǵan. Arys qalasynda ornalasqan 17 sektor boıynsha 24 maýsymnan bastap dárigerler táýlik boıy qyzmet kórsetip keledi. Túrkistan oblysy qoǵamdyq densaýlyq basqarmasynyń basshysy Muqan Egizbaevtyń basqarýymen arnaıy medıtsınalyq shtab úzdiksiz jumys atqarýda.
28 maýsymy men 18 shilde kúnderi aralyǵynda Arys qalasynda 18 myńnan astam jeke jáne kópqabbatty turǵyn úılerdiń, 441 mekemeniń aýlalary tekserilgen.
«Tekserýler nátıjesinde turǵyndar men saýda oryndarynan 11 myń kelige jýyq azyq-túlik tárkilendi. Qaladaǵy barlyq qoqys oryndary, ájethanalar zalalsyzdandyryldy. Jalpy 50-deı úı janýarynyń óleksesi shyǵaryldy. Aýmaqtardy tekserý, dárileý jumystary jalǵasýda. Qazirgi tańda Jambyl, Aqtóbe, Aqmola, Soltústik Qazaqstan oblystary men Nur-Sultan, Shymkent qalalarynyń mamandary jumys isteýde. Jalpy qalanyń epıdemıologııalyq jaǵdaıy tolyq baqylaýda», - dedi Túrkistan oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Nurbek Nyshanov.
Arys qalalyq aýrýhanasynda kúrdeli jóndeý jumystary júrgizilip jatqany belgili. Osyǵan oraı, naýqastarǵa Arys qalalyq emhanasy men Oblystyq klınıkalyq aýrýhanasynda jáne Ordabasy aýdandyq ortalyq aýrýhanasynda medıtsınalyq kómek tolyq, jan-jaqty kórsetilip jatyr.
