Arysta eki saǵat ishinde 4 úıdegi órtti sóndirdik - Dıas Toqshybaev

ARYS. QazAqparat - Arystaǵy apat barysynda bosqan jurtqa kómektesip, órt sóndirý jumystaryna qatysqan tótenshe jaǵdaı ókili QazAqparat tilshisine keshegi kúnniń qalaı ótkenin aıtyp berdi.

2006 jyly azamattyq qorǵanys salasyna kelgen Dıas Toqshybaev qazir Shardara aýdanyndaǵy №15 órt sóndirý bólimi bastyǵynyń orynbasary bolyp qyzmet etedi. Óziniń aıtýyna qaraǵanda Arystaǵy jaralys týraly habar bólimshege saǵat 9.30-da jetken.

«Saǵat 9.30-da habar tústi. Al 11.30-da Arysta boldyq. Áskerı eseptegi 2 kólikpen 8 adam bolyp keldik. Kele salyp qaladaǵy adamdardy qaýipsiz aýmaqqa oqshaýlaýǵa kómektestik. 3-4 saǵat boıy sodan bosamadyq. Qansha adamdy qaýipsiz jergen shyǵarǵanymyz naqty esimde joq. Sanap turatyn ýaqyt bolǵan joq. Arasynda múgedek jandar da boldy. Bárinen de solarǵa aýyr tıdi», - deıdi órt sóndirýshi.

Dıas Toqshybaevtyń jasaǵy qas qaraıǵan shaqta órt sóndirýge kirisip ketken.

«Bizdi Aımaýytov kóshesinde janyp jatqan úılerge baǵyttaǵan bolatyn. Sondaǵy №43, 45, 47 úılerdi, Aqmyrzaev kóshesindegi №27 úıdi ottan arashaladyq. Qora-qopsylary japsarlas úılerge jalyn tizbek boıynsha ótip otyrǵan ǵoı. Bul 4 úımen 2 saǵattaı alystyq. Sonyń arqasynda órt mańaıyndaǵy ózge úılerge tarap úlgermedi», - deıdi ol.

Órt sóndirýshi 2009 jylǵy órt kezinde de Arysta bolǵanyn eske aldy.

«10 jyl buryn da órt sóndirýge kelgenbiz. Ol kezde mundaı úreı, qıraý bolmaǵan edi. Abyroı bolǵanda mańaıymyzǵa snarıad qulap, berekemizdi alǵan joq. Eń bastysy qasymdaǵy jigitterdiń bári aman-saý. Mundaı shaqta ol da úlken olja. Túngi saǵat 23.00-ge deıin tynbaı qımyldadyq. Al búgin bizdiń ornymyzǵa jańadan kelgen lek shyqty. Áli de eldiń qajetine qaraı jumys isteı beremiz», - dedi ol.

Eske salsaq, Arystaǵy jarylys kezinde áskerıler óz kúshimen eki tehnıkalyq aýmaqty sóndirip úlgergendigin buǵan deıin jazǵan bolatynbyz.