Arysta «Bıznesten bızneske kómek» jobasy júzege asýda

ARYS. QazAqparat – Jarylys bolǵan Arys qalasynyń kásipkerlerin qoldaý maqsatynda elimizdegi segiz iri kompanııa qarjylaı kómek kórsetti. Búginde «Bıznesten bızneske kómek» jobasy aıasynda 85 nysanǵa 700 mln teńgege jýyq qarjy bólindi, dep habarlaıdy QazAqparat tilshisi.

Jobanyń basty úılestirýshisi «Meniń Atamekenim» qoǵamdyq birlestigi.Qarjylaı demeý bildirgenderdiń qatarynda «ERG kómek» korporatıvtik qory, «Korporatsı Kazaqmys» JShS, «KazAzot» AQ, «Ýst-Kamenogorskıı tıtano-magnıevyı kombınat» AQ, «Aktıýbınskaıa mednaıa kompanııa» JShS, «Vostoktsvetmet» JShS, «Bogatyr kómir» JShS, «Voshod Hrom» JShS bar. Al, qurylys jumystaryn «Alja qurylys» kompanııasy atqarýda.

Jalpy Arys qalasynda 500-den astam kásipkerlik nysany bar. Qalada oryn alǵan tótenshe jaǵdaı saldarynan olardyń 484-ne zaqym kelgen. Sondyqtan jóndeý jumystaryn qajet etedi. 316 nysannyń ıeleri óz kúshimen ǵımarattaryn retke keltirip alypty. Al, 12 kommertsııalyq obekti qatty zaqymdalǵandyqtan tolyǵymen buzylǵan.

«Meniń Atamekenim» QB-ne Arystyq shaǵyn jáne orta bıznes ókilderinen 133 ótinish tústi. Olardyń basym bóligine kómek berdik. Al, qalǵany qujattaryn tolyqtyryp jatyr. Kásipkerler qajetti qujattardyń tolyq paketin jınaqtap ótkizgen jaǵdaı eseptelgen shyǵynǵa oraı qarjy beremiz», – deıdi «Meniń Atamekenim» QB atqarýshy dırektory Lázzat Shyńǵysbaeva.

Búginde tótenshe jaǵdaıdan zardap shekken Arys qalasyndaǵy kásipkerlik nysandaryn retke keltirý jumystary úlken qarqynmen júrgizilip jatyr. Bul iske óńirdegi «Atameken» Ulttyq kásipkerlik palatasymen qatar, elimizdegi ulttyq kompanııalar jáne iri bıznes ókilderi belsendilik tanytýda.