Arysta bir otbasynyń 7 adamy koronavırýs ınfektsııasynan aıyqty
ARYS. QazAqparat – Túrkistan oblysynda bir otbasynyń 7 múshesi qaýipti indetten aıyǵyp shyqty. Arys aýdanynyń turǵyndary aldaǵy ýaqytta úı karantıninde dárigerlerdiń qadaǵalaýynda bolady, dep habarlaıdy QazAqparat tilshisi.
Oblystyq tótenshe jaǵdaı shtabynyń sońǵy málimetine saı, Arys qalasynda «Naýryz» móltek aýdany men oǵan irgeles eldi mekende karantın jarııalanǵan bolatyn. Shuǵyl túrde aýrýdy aýyzdyqtaý sharasynyń arqasynda 3 myńnan astam halyq 4 saǵattyń ishinde tolyq medıtsınalyq tekserýden ótken. Osylaısha qaýipti indettiń basqa aımaqtarǵa taralýyna tosqaýyl qoıylǵan. 40 medıtsına qyzmetkeri qaýipsizdik sharalaryn qadaǵalaı otyryp, turǵyndardyń dene qyzýyn ólshep otyrǵan. Olardy tekserýden ótkizgen. Koronavırýs ınfektsııasynyń oshaǵyna aınalǵan aımaqta táýlik boıy qyzmet kórsetetin medıtsınalyq tirek beketteri ornatylǵan.
Turǵyndar alysqa barmaı-aq, úıleriniń janyndaǵy dáriger kómegine júginip kelgen. Barlyq maǵlumattar shtabqa habarlanyp, shuǵyl ári kásibı júrgizilgen jumystyń arqasynda aýrý basqa jaqqa taraǵan joq.
Jalpy, aýdan boıynsha dertke shaldyqqan 17 naýqas tirkelgen. Olardyń 14-i jazylyp shyqqan. Jaqyn jáne yqtımal qarym-qatynasta bolǵan 28 adamnan da synama alynyp, teris nátıje berýine oraı úılerine qaıtarylǵan.
Otbasymen qaıta qaýyshqan azamattar aq halatty jandarǵa alǵystaryn bildirýde.
