Arysta bankter men saýda oryndary jumys isteı bastady

ARYS. QazAqparat - Tótenshe jaǵdaıdy bastan ótkergen Arys jurtshylyǵy úılerine oralyp, tirshilik qyza tústi. Arystaǵy barlyq bank bólimsheleri ashylyp, jumysyn bastap ketti. Turǵyndarǵa jalaqy, ataýly áleýmettik kómek, zeınetaqy jáne járdemaqy aýdarylýda.

Qaladaǵy saýda oryndary men bazarlarda, dúkenderde azyq-túlik, turmysqa qajetti zattar men buıymdar, taýarlar satylyp jatyr. Un, makaron ónimderi, kıim-keshek, kókónis satylymǵa shyqty. Mal bazary da ashyldy. Kásipkerler qalypty jaǵdaıda jumys isteýde.

Al dúkenine zaqym kelgen kásipkerlerge nysandardy jóndeý úshin memleket tarapynan qoldaý kórsetiledi. Olarǵa arnaıy sektorlarǵa bólingen qurylysshylar kómektespek. Nysandar qysqa merzimde jóndeledi.

Arys qalasynda 340-tan astam kásipkerlik nysany bar. Onyń ishinde 164 dúken, 5 bazar, 8 toıhana, 28 kafe, 6 naýbaıhana, 5 dámhana, 5 qonaq úı tirkelgen. Osy nysandardyń zardap shekpegenderi qalypty jaǵdaıda jumysqa kirisip ketti.