Arysta ardagerlerge arnalǵan belsendi ómir súrý ortalyǵy ashyldy
Qalanyń jańa ákimi Gúljan Qurmanbekovanyń túrtki bolýymen ashylǵan ardagerlerge arnalǵan «Belsendi ómir súrý» ortalyǵynda ardagerler keńesi men sportpen shuǵyldaný aımaǵy ornalasqan. Sonymen birge qajetti jıhazdarmen jabdyqtalǵan tuz shahtasy, sensorlyq bólme, ınternet-kafe, ıoga, ústel tennısi, bılıard, shahmat, doıby oıyndary aımaqtary men kitaphana qyzmetin usynady.
Zamanaýı úlgide jabdyqtalǵan, elimizde teńdesi joq ardagerler úıiniń ashylý saltanatyna Túrkistan oblysynyń ákimi Ómirzaq Shókeev qatysty.
«Sanadan eshqashan óshpeıtin uly erlik, búgingi tynyshtyq besigin terbetken jeńimpaz jastardyń qaıratyn janyp, bekemdigin bekite túsetindeı. Atalar aıbyny – izbasarlarǵa amanat! Urpaqtar sabaqtastyǵyn umytpaı eske salyp otyratyn osy bir qos qýanysh barshamyz úshin de osynysymen qundy. Ardagerlerimiz aman, jastarymyz otanshyl bolsyn! Arystyq ardagerler úshin jasalǵan osyndaı ıgi bastama, úlgi bolar is ári qaraı ózge aımaqtarda jalǵasyn tabady dep senemin»,- dedi oblys ákimi Ómirzaq Shókeev.
Arys qalasynyń ardagerleri úshin merekede úlken tartý bolyp otyrǵan ǵımarattaǵy úılestirý jumystaryn Arys qalalyq jumyspen qamtý jáne áleýmettik baǵdarlamalar bólimine qarasty «Asyl júrek» áleýmettik ortalyǵy júzege asyratyn bolady.
Ásem ǵımaratta qarttardyń bas qosyp, jıyn ótkizýlerine, tynyǵyp, shyǵarmashylyqpen aınalysýy úshin barlyq jaǵdaılar jasalǵan. Terapevt dárigeri men emdik massaj bólimi jumys isteıdi. Arys qalasyndaǵy 6 myńnan astam ardager úshin bul ortalyqtyń ashylýy úlken qýanysh. Sebebi buǵan deıin ardagerlerge arnalǵan mundaı oryndar bolmaǵan.
Aıta ketý kerek, eki qabattan turatyn ardagerler ortalyǵy ǵımaratynyń bir bóligi «Neke saraıy» retinde óz jumysyn bastady.
Oblys ákimi aqsaqaldarmen júzdesip, olardy Jeńis kúnimen quttyqtady. Shara barysynda sanıtarlyq talaptar qatań saqtaldy.
Arys qalasyna jumys sapary barysynda oblys ákimi Ómirzaq Shókeev Reseı naryǵyna jol ashqan Aqdala aýyldyq okrýgindegi jeke kásipker Rahymjan Kenjebaevtyń jylyjaı kesheninde boldy. Jylyna eki márte qyzanaq pen qııar ónimderin elimizdiń birneshe oblystarymen qatar, Reseıge eksporttap otyrǵan kásipker jylyna 200 tonnaǵa jýyq ónim shyǵarady. Kásibin 25 sottyq jerden bastap, jylyjaı aýmaǵyn 3,5 gektarǵa jetkizgen. Reseıge jóneltilip jatqan qııardyń 1 kelisi 250 teńgeni quraıdy.
Kásipker suranysqa saı jylyjaı aýmaǵyn ulǵaıtýdy josparlap otyr.
Oblys basshysy baspana kezeginde turǵan azamattarǵa arnalyp salynǵan Arystaǵy kópqabatty turǵyn úılerdi aralap kórdi. «Kóktem - 2» yqshamaýdanyndaǵy jalpy aýmaǵy 6 myń sharshy metrdi quraıtyn 36 páterlik 3 qabatty úılerdiń qurylysy tolyq aıaqtalǵan. Jaqyn kúnderi kommýnaldyq turǵyn úı kezeginde turǵan 100-den asa otbasyna páterler tabystalady. Sondaı-aq, jyl sońyna deıin taǵy 240 arystyq otbasy baspanaly bolady. Búginde munda 4 birdeı kópqabatty úıdiń qurylysy júrip jatyr.
