Arysta 7700-den astam úı kúrdeli jóndeýden ótedi

ARYS. QazAqparat - Arysta 7700-den astam turǵyn úı tolyq jóndeýden ótedi. Túrkistan oblysynyń ákimdigi osyndaı málimet taratty, dep habarlaıdy QazAqparat tilshisi.

Ákimdiktiń aqparatyna sáıkes, Arystaǵy jarylystan 21 úı tolyqtaı órtenip ketken. Onda turǵan 28 otbasy músheleri ýaqytsha orynǵa jaıǵastyryldy. Kúli qalǵan baspanalardyń ornyna jańadan úıler salynatyn bolady.

Arys qalasynda 7700-den astam úı bar bolsa, olardyń kóbiniń shatyry men esik-terezeleri jarylystan zardap shekken. Qalada qurylys-jóndeý jumystaryna kómek berý úshin elimiz óńirlerinen 170 arnaıy brıgada keletini kútilýde. Qala sektorlarǵa bólingen, jumystar erteń bastalady. Qurylysshylar tapsyrylǵan mindetti 1 aıdyń ishinde tolyq aıaqtaıtyny josparlanǵan.

Sondaı-aq, toǵyz joldyń torabynda ornalasqan qalada búginnen bastap sý júıesi júıeli jolǵa qoıyldy. Qazir barlyq úıge sý berilýde. Buǵan deıin ortalyq magıstralda shyqqan aqaýdan 1500-deı abonent sýsyz qalǵan bolatyn. Jóndeý jumystary barysynda sý jetkizý jelisin úzgen snarıad tabyldy. Qazirgi tańda aqaý saldary joıylyp, jóndeý jumystary aıaqtaldy. Turǵyndarǵa sý turaqty berilýde. Aıta keteıik, Arysta 10 600 abonent bolsa, búginde sý taratý kólemi 2,5 esege ulǵaıǵan.

Aıta keteıik, búgin Premer-Mınıstri Asqar Mamın Arys qalasyna keldi. Respýblıkalyq komıssııanyń otyrysy barysynda qalanyń árbir turǵynyna 100 myń teńgeden beriletini aıtyldy. Sondaı-aq Arys tolyǵymen bir aıdyń kóleminde qalpyna keltirilip, jańadan aýrýhana boı kóteredi, gaz júıeleri tartylady.